Arthur Dowers no ta interesa pa debate cu Otmar Oduber

ORANJESTAD – Minister di husticia Arthur Dowers no ta interesa pa bay den un debate cu ex colega Otmar Oduber. Asina e mandatario a bisa noticiacla.com recientemente como follow up riba e declaracionnan cu el a haci contra su ex colega Otmar Oduber, y cu a reacciona despues. Ora cu e portal aki a confronta e mandatario cu e ‘reto’ cu Oduber a pone pa su ex colega, e mandatario a bisa cu el a simplemente reacciona loke tabatin ‘riba mesa’ y no ta bay duna mas informacion. “Mi no ta sinti cu tin ningun necesidad na e momento aki. Nos no ta den campaña na e momento aki oficial pa bay den un debate” Dowers a bisa.

NADA NOBO PRESENTA

Segun e mandatario, e no a trece nada nobo dilanti biaha pasa, sino mas bien cosnan cu ‘nan’ (Oduber) a trece dilanti y el a bisa loke e tin di bisa. “Na momento cu nan bin cu nan cosnan, nos lo refuta nan. Pero no tin necesidad segun mi pa sigui aworaki pa amplia riba e cosnan aki aworaki pasobra tin hopi otro trabou pa haci” Dowers a sigui bisa.

ACUSA NINGUN HENDE

Un di e critica cu e ultimo entrevista cu Dowers a crea, ta e hecho cu Dowers lo ‘ no a actua contra cosnan illegal cu e lo a bisa cu a tuma lugar na p.e. conciertonan cu Otmar Oduber tabata responsabel pe’. “Mi no a acusa ningun hende di nada strafbaar” Dowers a bisa e portal aki. “Na momento cu ami sa cu un hende ta envolvi den algo strafbaar, mi ta zorg pa e informacion yega na e autoridad competente pa investiga nan” Dowers a sigui bisa. Loke mi a presenta tabata simplemente reaccion riba ponencianan di e grupo aki y nan hendenan y algun di nan seguidornan y nos a clarifica den mi concepto, cierto cosnan. E cosnan ey wat mij betreft ta cla y mi no a presenta ningun strafbaar feit” Dowers a bisa. Como hurista, el a indica cu e sa bon bon ki ora ta strafbaar y ki ora no. Pues e mandatario no ta bay duna oido na e reto poni pa ex colega Oduber.