InselAir Aruba ta parti di e deal cu gobierno di Corsou

WILLEMSTAD - E deal cu InselAir International a cera cu gobierno di Corsou cu ta inclui un fiansa cuantioso (33 miyon florin) ta conta tambe pa InselAir Aruba. Y esey ta nifica cu pa e periodo vigente, gobierno di Corsou tin parti tambe den InselAir Aruba. Asina e minister Eugene Ruggenaath a bisa durante un conferencia di prensa di Corsou. A confirma cu a aproba e suma di 33 miyon florin cu lo keda transferi den tranches. Ademas a sigura cu e no ta pa yuda InselAir como compania, sino pa 'garantisa conectividad entre e islanan'. Pues ta yudando a base di 'interes general' y no pa un solo compania. Den un conferencia di prensa diadomingo atardi, gobierno di Corsou a duna mas detayes riba e 'deal' cu a keda acorda diabierna ultimo. Mientrastanto un di e 6 avionnan geground a keda liber diadomingo. 

HEERENVEEN 

Mientrastanto den un combersacion cu NoticiaCla.com tabatin cu un di e gerentenan y co-fundador di e compania Edward Heerenveen diasabra, ela mustra cu e suma acorda, ta un 'overbruggingscrediet' pa por sali for di e  problema cu nan tin debi na e placa cu ta pega na Venezuela di 100 miyon dollar. A haci calculacion cu pa luna, e compania tin un deficit di 2.5 miyon. Gobierno a bay di acuerdo cu ne pa yuda e aeroliña, pa e proximo 6 luna unda cu InselAir tin cu indica pa medio di un plan con ta bay sali for di e problemanan aki. Segun Heerenveen te cu aña pasa e compania tabatin ganashi. Tin cu demonstra con ta bay gana 2.5 miyon florin pa luna extra y no esey so, pero demonstra cu despues di e 6 lunanan, por handle bo mesun sistema y costonan di un forma responsabel. 

KICO GOBIERNO TA HAYA A CAMBIO

Como parti di e deal, gobierno ta haya un cantidad di accion den e compania cu nan por uza si InselAir no cumpli. Manera palabra, den RvC di InselAir, gobierno ta haya 2 miembro y InselAir tambe. Entre nan ta nombra un presidente di e RvC. Esey a bira ex minister di finanza Jose Jardim. "Nos ta hopi contento cu ne". Gobierno a haya e derecho tambe di nombra un presidente Canades di directiva di InselAir. E persona ey ta yega Corsou diadomingo anochi pa cuminsa su labor otro siman. Ademas ta bin un director di finanza (ta amplia e directie cu dos persona). A pone e periodo di cambio aki pa 6 te 9 luna, aunke cu gobierno a anuncia cu e periodo aki ta pa 5 aña. 

UPDATE RIBA AVIONNAN GEGROUND

NoticiaCla.com a haya confirmacion diadomingo atardi di parti di director di departamento di aviacion civil (DCA) Edwin Kelly cu un di e avionnan di InselAir Aruba cu tabata geground na Corsou, a keda 'libera' pues por wordo poni bek den operacion. E otro avionnan ainda sinembargo ta ketobay geground, debilitando e operacion di InselAir International seriamente. Tin un cantidad cuantioso di pasahero di InselAir pega varios destinacion y ta purbando pa resolve e problema aki.  Manera cu NoticiaCla.con a raporta den fin di siman, DCA a ground tur avion jet di InselAir Aruba e siman aki, e ultimo dosnan diabierna atardi.