Henter flota di jet di InselAir Aruba ta na tera

WILLEMSTAD/ORANJESTAD - Cu excepcion di e bueolonan entre Aruba, Corsou y Bonaire, tur otro buelo di Insel Air a keda tera (geground) diasabra. For di fuentenan cerca di Direccion Civil di Aruba, NoticiaCla.com a compronde cu ta trata di un total di 6 avion jet. E prome dos avionnan a wordo geground diamars (manera cu NoticiaCla.com a raporta caba), sigui pa 2 mas diaranson, sigui pa e resto diabierna.  Miembro di gerencia Edward Heerenveen a confirma pa NoticiaCla.com cu Directie Luchtvaart di Aruba (DCA) a haci esaki debi na cierto fayonan di presion cu a encontra riba un of dos avion. Y a dicidi di ground tur avion cu por tin similaridad, y den esaki pues, a opta pa ground tur e avionan jet di Insel Air den forma di prevencion, creando un dolor di cabes grandi pa e compania. Y segun Heerenveen, no por dicidi ki ora/dia ta resolve e problema ni sa cuanto lo dura, pasobra no kier ansha DCA ya cu ta nan ta dicidi y ta nan manera di traha. 

PASAHERONAN 'STRANDED' VARIOS CAMINDA

E situacion aki a pone InselAir den problema unda cu tin cu wak con ta trece e cantidad di pasahero cu nan a transporta pa varios destinacion y cu ta pega aworakia. "Nos ta bezig ta wak con nos por solucion'e. Ainda nos no a logra, y tin hende para tur caminda aworaki" Heerenveen a bisa. Ta purbando pa diadomingo haya algo for di Miami, pero e otronan ta dificil pa haya avion. 

FIANSA DI 33 MIYON FLORIN 

Tur esaki ta bin apenas un dia despues cu e compania a haya un suma miyonario di 33 miyon florin aproba di gobierno pa por yuda sañea e aeroliña. "E fiansa no tin nada di haber cu e problemanan aki" Heerenveen a sigura e portal aki. Ta un suma cu a pidi pa por 'rescata' e compania pa motibo di placa cu ta peg'a na Venezuela, pa cual Heerenveen a mustra su gradicimento grandi. "Nos ta masha agradecido pa e ayudo aki", e hefe a sigui bisa. 

COMPRENSION PA AVIACION CIVIL 

Heerenveen a mustra comprension pa e departamento di aviacion civil, cu nan tin cu haci nan trabou pa sigura cu tur cos ta bay manera debe ser. "Nan mester compronde tambe cu nos tin e mesun deseonan pa e buelonan ta safe y sigur" Heerenveen a bisa, argumentando cu a demonstra esey pa mas di 10 aña, unda cu no tin incidentenan grandi cu a pasa den e periodo ey. "Pero si nan ta haya cu nan tin cu haci'e un manera y wak e otro cu nos, ta nan prerogativo pasobra esey nan tin e 'oversight' riba e avionnan, y nos no ta discuti esey". Loke e ta pidi ta pa ora cu bo tin 4 avion wanta, bo no ta wak tur cuater pareu. "Cuminsa wak nan un pa un pasobra nos a haci tur e cosnan (di seguridad) caba. Nos a haci testvluchtnan caba, nan sa cu nos a haci nan caba" e hefe a bisa. Como tal e ta haya cu tin cu tuma desicion awor. "Haci e testnan riba e avionnan nobo, bini Corsou bin wak nan, handle cu nos, pa nos sa kico nos por haci pa asina nos por release e avionnan mas lihe posibel". Nan lo cumpli segun e control ta sigui. E no tin duda di e compania pero ta pidi nan pa un tiki di leniency, no den aspecto di duna e avion liber sino den pensa cu gerencia y wak con liher ta pone e avionnan aki bek (den servicio). Heerenveen a sigura cu tur e avionnan ta safe, tabata safe y lo keda safe. 

DCA

For di fuentenan cerca di departamento di aviacion civil, NoticiaCla.com a compronde cu ta depende di Insel Air mes con liher ta cuminsa release e avionnan. No por a duna un ora of dia. Ta ora cu InselAir cuminsa entrega documentonan bek, por check nan tambe si a cumpli cu e rekisitonan. E ora poco poco lo por cuminsa 'release' e avionnan bek. A confirma cu e prome dos avionan a keda geground for di diamars, sigui pa dos avion mas diaranson, y diabierna a ground e resto. Ta trata di avionnan di Insel Air Aruba cu tabata coopera cu Corsou debi cu nan propio avionnan ta den mantencion, of por lo menos mayoria. Esey a pone cu InselAir international ta pega aworaki cu tur e avionnan di Aruba (jet) na tera.