Grupo lidera pa Alonso Tromp a tene un reunion ilegal

ORANJESTAD - Apenas algun ora despues cu e grupo den partido PDR cu ta sostene Alonso Tromp a tene un reunion y eligi un directiva nobo segun e grupo, Andin Bikker a reacciona for di Hulanda. "Un grupo di apenas cinco persona a purba hunto cu sr. Alonso Tromp den un reunion ilegal pa pretende cu nan lo a eligi un "directiva nobo" di Partido Democracia Real" Bikker a bisa. Como tal Bikker ta considera e reunion ey ilegal y pues no tin ningun validez. "Ya desde comienso di siman a avisa e personanan aki via abogado cu nan no ta miembro y cu nan ta actuando di mala fe. Camara di Comercio tambe a wordo avisa cu e personanan aki no tin ningun tipo di autoridad. No obstante nan a core tene un reunion ilegal pa saca un comunicado cu nan lo a cambia bestuur di Partido Democracia Real, loke ta duna di conoce cu nan ta wordo dirigi pa forsanan ageno y opositor, cu e unico interes pa manipula informacion y crea un percepcion incorecto" Bikker a sigui bisa. Segun e politico, ta di spera cu Camara di Comercio lo actua diligente y no acepta e inscripcion di e reunion ilegal y e "reunion" pues lo keda sin ningun validez. Lo tene tur e personanan aki, incluyendo sr. Alonso Tromp, personalmente responsibel pa tur daño material. "A taha" Bikker a finalisa bisando. Pues aworaki tin dos coriente den e partido, cada un indicando cu nan ta lidera e partido. Hecho ta cu tin un grupo cu a eligi un directiva, mientras cu na Camara di Comercio (ainda) tin un otro directiva inscribi.