Venezuela a admiti cu a hipoteca Citgo na Merca

CARACAS - E compania estatal Venezolano PDVSA a confirma e raportahe di Redd Intelligence y Latin American Herald Tribune, y cu NoticiaCla.com a reproduci diabierna ultimo, esta cu a descubri cu Venezuela a hipoteca Citgo pa e compania petrolero Ruso Rosneft. Mes momento sinembargo tabata hopi defensivo, lansando mes momento un atake riba e portadornan di e noticia, esta LAHT, REDD y Russ Dallen. Pa loke ta Aruba, minister di Economia Richard Arends, cu e tempo ey tabata e hefe di e team negociador pa e Citgo deal, a mustra cu e abogadonan di Citgo ' no tabata na altura di e deal aki'. Algo cu aworaki PDVSA mes ta admiti. 

ADMICION

E compania a admiti cu nan a hipoteca 49.9% di e tres refineria cu e ta doño di dhe pafo di Merca. Esaki segun PDVSA, tabata pa genera mas placa pa financiamento. Sinembargo PDVSA no a revela kico nan a ricibi a cambio di e accionan, ni pakico a tene esaki como un secreto. Pero segun e articulo di dialuna, ta parce cu Rosneft a fia PDVSA 1.5 biyon dollar a cambio di tin accion den CITGO. "Citgo ainda ta propiedad di PDVSA" e compania a sigui bisa den un declaracion, pero despues den e mesun texto, ta admiti cu na october ela uza 50.1% di Cirgo como un intercambio di bono. Si PDVSA faya di paga bek, Rosneft y accionistanan por converti nan mes den doño di Citgo. 

 "Ta importante pa stress cu cualkier compania mundial di clase manera Petroleos di Venezuela, ta uza su propiedad pa sostene su transaccionan y contene su inversionan" PDVSA a sigui bisa. Ademas a bisa cu e ultimo deal aki a wordo haci mey mey di atake di prensa, pero tambe durante un periodo adverso pa e industria mundial di petrolio. "PDVSA ta rechasa raportahe di media y comentario basa riba speculacion, rumor y informacion parcial cu ta desacredita e corporacion, haci pa voceronan  interesa den genera destabilisacion politico den nos pais" e declaracion a sigui bisa. E articulo ta sigui cu desacredita e autornan di e articulo anterior, punto pa punto. Por lesa e articulo completo aki.