PDVSA den secrecia a hipoteca refinerianan Citgo na Merca cu Rusia

CARACAS - Venezuela den secrecia a hipoteca nan refinerianan di Citgo na Merca pa e compania petrolero Ruso Rosneft. Asina e website Latin American Herald Tibune (LAHT) ta raporta den nan edicion di awe. Nan ta cita un citacion di Delaware Uniform Commercial Code (UCC) contra e compania madre di Citgo, PDV Holding, Inc. di dia 30 di november ultimo. Redd Intelligence a raporta e noticia aki. Mientrastanto diabierna atardi e hefe di e team negociador pa e Citgo Deal na Aruba, actual minister di economia Richard Arends a bisa NoticiaCla.com cu Citgo no ta na altura di e informacion aki. "Mi a check cu abogado di Citgo, y nan no ta na altura di nada. Nan a bisa nos cu ta prome biaha nan ta wak e publicacion aki" Arends a finalisa bisando. 

KICO E HIPOTECA TA NIFICA

PDV Holding Inc., cu ta di e compania di estado Venezolano  Petroleos de Venezuela, S.A. (PDVSA),  ta doño di  Citgo Holding Inc., cu na su turno ta doño di Citgo Petroleum Corporation, cu tin 3 refineria y pipa ta pasa dor di Merca. Loke e hipoteca aki ta nifica, ta cu si Citgo of PDVSA faya cu pagonan, e compania Ruso lo bira propietario di refinerianan importante strategiconan aki na Merca. 

E DEAL

Segun e detayenan descubri di e deal, PDVSA a hipoteca no menos cu 49.9% di Citgo na Rosneft pa sigura un prestamo di 1.5 biyon dollar. Na october caba PDVSA a uza 50.1% di Citgo Holding Inc caba como garantia pa convence doñonan di bononan balora na 2.8 biyon di dollar pa alarga esaki pa 4 aña mas laat. E caso di Rosneft awor ta nifica cu 100% di Citgo Holding ta comprometi awor. 

KEN TA ROSNEFT

Rosenft a wordo funda na 1992 y a bira e productor di petrolio y gas mas grandi di mundo, cu 5.2 miyon bari pa dia. Na 2004, Rosneft a tuma e competidor Yukos over despues cu presidente Ruso Vladimir Putin a encarcela su hefe Mikhail Khodorkovsky. Gobierno Ruso ta 69.5% doño di Rosneft y e hefe Igor Sechin ta un aliado pa hopi tempo di Putin.