InselAir: 'Rol di gobierno den InselAir no ta determina ainda'

WILLEMSTAD - ' No tin ningun proposicion, ni discusion ni cita cu accionistanan di InselAir y como tal, cualkier speculacion con e envolvimento di gobierno (di Corsou)lo ta den operacion y directiva di supervision di e compania, ta incorecto'. Asina e CEO di InselAir International Albert Kluyver a manda bisa tur e empleadonan di e compania diahuebs pa medio di un memo interno cu NoticiaCla.com a logra pone su man ariba. E memo ta a rais di e hecho cu for di ayera cu e desicion a keda anuncia cu gobierno lo haya un tarea participativo den e compania, rumornan a cuminsa core di kico exactamente esaki lo ta. 

HALA DIRECTORNAN UN BANDA

Mas tempran, NoticiaCla.com for di su fuentenan cu ta cerca di e compania, a desmenti cu e deal nobo cu gobierno ta ensera cu lo 'hala directornan actual un banda y pone un director di afo'. Esey no ta corecto segun e fuentenan a sigura e portal aki. Cu e memo interno, esaki ta wordo reitera un biaha mas. Fuera di e clarificacion aki, e memo ta mas bien splica mas di e deal cu gobierno a yega na dje pa yuda e compania aereo. 

ENVOLVIMENTO DI GOBIERNO

E memo ta haci mencion cu enberdad gobierno lo tin un cierto grado di envolvimento den e compania y influencia den e maneho y supervision di e compania. "Ta premira cu esaki lo ta den forma cu gobierno su postulacion di varios posicion adicional den e directiva di supervision y of gerencia" e memo ta sigui bisa. "Pero e posicionan ey mester wordo discuti y aproba pa e accionistanan hunto cu gobierno" e memo ta finalisa bisando.