Jerry Staring ta director nobo Directie Volksgezondheid

ORANJESTAD - Cinco luna despues cu NoticiaCla.com a bin cu e noticia, porfin gobierno a haci e anuncio oficial pa  anuncia postulacion di Drs. Jerry Staring, Bsc como e director nobo di Directie Volksgezondheid, tambe conoci como Departamento di Salud Publico Aruba (DESPA). E ultimo director di e departamento tabata Dr. Jacques van Veen na aña 1991. Despues di esey semper tabatin directornan interino of Management Team. NoticiaCla.com a anuncia esaki for di mei ultimo, ya cu for di februari su nombramento tabata cla, pero burocracia a tarda e proceso. Recientemente ainda NoticiaCla.com a puntra minister encarga cu salud, kico e tardansa tabata, y a confirma cu tabata burocracia. 

Jerry Staring a studia pa "verpleegkundige" na nivel HBO, pues a haya su "bachelor in nursing". Ela specialisa den psikiatria y a core "stage" den Dr. Horacio E. Oduber Hospitaal na Aruba. El a caba su estudio na aña 2002 na Hoge School Arnhem-Nijmegen. Mesora despues el a cuminsa su carera como nurse na PAAZ, mientras cu na final di aña 2003 el a bay traha na Psikiatria Ambulatorio bou Directie Volksgezondheid Aruba. 

Den un esfuerso pa prepara su mes miho pa un puesto den liderazgo, ela opta pa sigui studia na Universidad di Aruba, den e facultad di “Arts & Sience” cu e tema specifico di "Social Work & Development", brinda den cooperacion cu Universidad di Puerto Rico y Vrije Universiteit van Amsterdam. Na aña 2011 el a caba cu su estudio na nivel "Master" riba maneho di cuido medico. Cu e diploma ey den su man, el a cambia di trabou y for di SPD a opta pa cuminsa un carera nobo como "Beleidsmedewerker" na Directie Volksgezondheid. Na fin di aña 2011 ela traha na FCCA como "Stafmedewerker Integraal Opbouwwerk". 

 Cu e conocemento, experencia y educacion obteni, entre 2011 pa 2013, Jerry Staring a fungi como "Gastdocent" na Universidad di Aruba, den e facultad di nivel Bachelor den "Social Work Development". 

Na aña 2013, ela acepta e funcion di "Senior Beleidsmedewerker Zorg" na Ministerio di Salud Publico, Maneho di nos Grandinan y Deporte. Na october aña 2014 el a cuminsa den e funcion di Presidente di e Management Team di Directie Volksgezondheid y dos aña despues, na october 2016, ela bira e director nobo di DVG, despues di un proceso transparente pa busca un lider pa sigui maneha e departamento cu ta di vital importancia pa nos pais.

Jerry Staring a nace na Hulanda, su mama ta Arubiano di Socotoro, su tata un Hulandes-Europeo, pero cu a traha como docente pa hopi aña na Aruba. E mes ta e unico ruman cu a nace na Hulanda. E tin 2 yiu muhe, un di 9 aña y otro di 10 aña di edad.