Gobierno a aproba director nobo di salud pero no ta sali afo cu ne ainda

ORANJESTAD - Mientras cu conseho di minisater a nombra un director pa departamento di salud, den persona di Jerry Staring, segun minister di salud Alex Schwengle, e no por sali afo cu ne ainda, mirando cu mester regla un cantidad di burocracia. "E no ta prudente cu bo ta sali afo cu ne asina"  Schwengle a bisa. E ta admiti cu a pasa e nombracion di e director den conseho di minister, pero e no ta full formalisa ainda y p'esey no a participa nada oficial ainda. 

NOMBRACION COMIENSO DI AÑA

E nombracion de hecho, NoticiaCla.com for di comienso di aña a anuncia. E tempo ey gobierno a bay di acuerdo pa haci esaki un hecho. Sinembargo burocracia y otro asuntonan gubernamental a tranca e nombracion oficial y ta te algun siman atras oficialmente e nombracion a keda aproba y firma den conseho di minister.

JERRY STARING

Staring pa un tempo caba ta envolvi den cierto parti di maneho di DVG. Y na januari e decision a cay cu Staring ta haya su nombracion.  Anteriormente e ley tabata poni cu e persona mester ta un medico. Pero e ley a keda adapta di tal forma cu esey no ta necesario mas. Esey ta pone cu Staring, cu no ta medico sino un verpleegkundige di profesion, por a haya e funcion aki. Actualmente Staring ta consehero di maneho di salud pa Gobierno di Aruba, osea beleidsadviseur y miembro di management team di DVG.

ANUNCIO PARCIAL

Tabata durante e anuncio di Gobierno di e traspaso di e LandsLab pa hospital na comienso di aña, cu e mandatario di Salud a sigura cu e anuncio oficial lo bin probablemente e siman ey mes. Sinembargo, ya caba e noticia tabata coriendo den e departamento. Y manera cu NoticiaCla.com a raporta e tempo ey, fuentenan fidedigno a confirma pa NoticiaCla.com cu Staring tabata e persona cu a haya e confiansa di Gobierno y minister di salubridad pa asumi e tarea importante aki. E mandatario na e ocasion ey (traspaso di laboratorio) a bisa, cu e persona no ta un director durante ora di trabou so, sino 24 ora pa dia. Y e mester ta un persona cu por maneha un departamento asina importante, cu ta bin cu un sin fin di responsabilidad.

MANAGEMENT TEAM

Pa un tempo caba, DVG ta wordo maneha pa un management team, cu personanan manera Wilmer Salazar y Staring mes  

CURICULO

Staring a traha como verpleegkundige na e departamento psyciatrico di Aruba, tambe tabata miembro di bestuur di Wit Gele Kruis, y pa e ultimo dos añanan ta consehero di Gobierno riba tereno di salud. El a caba su bachelor di verpleegkundige na Hogeschool van Arnhem na 2001, y a haya su masters na Universidad di Aruba na 2011.