Operador nobo pa ex Aura Casino: 'The deal is off'

PALM BEACH - "The deal is off!". Cu e palabranan ey, representantenan di e operador nobo di casino Island Gaming, a confirma na NoticiaCla.com den forma di primicia diabierna anochi, cu e oferta cu nan tabatin pa reapertura di e casino, ta for di mesa. Esaki ta nifica cu oficialmente nan ta hala nan oferta atras y no ta bira e operador mas di loke tabata antes Aura Casino den Occidental Hotel. E ta nifica tambe cu ni e 25 trahadonan cu si a keda selecta, lo no haya trabou. "E oferta tabata valido te cu 5'or pm (diabierna). Awor e deal ta off" e representante a sigui bisa e portal aki. Nan ta mustra cu nan a purba tur sorto di cos, y lamentablemente nan no por a keda cla cu e sindicato. "Nos ta lamenta esaki. Nos kier desea e empleadonan tur clase di exito y ta spera cu nan por haya loke nan kier den futuro", tabata e mensahe pa e trahadonan. Cu esaki tambe tanto e 25 trahadonan selecta como e 19 cu no a haya un deal, ta keda sin trabou definitivamente, y ta bin un fin na nan odisea di 10 luna di lucha. Esaki pasobra a compronde cu e hotel no ta busca mas operador pa e casino. Esaki tabata e ultimo oportunidad pa e trahadonan di ex Aura Casino haya trabou. Awe merdia ainda durante e noticiero "NoticiaCla Merdia" na POWER FM, un di e 25  trahadonan cu a keda selecta, a mustra cu e problema no ta e operador, sino FTA. Segun e trahado, FTA tabatin e deal aki caba, pero no a haci loke nan mester a haci. 

ULTIMATUM TA IREALISTICO SEGUN FTA

Sindicato FTA dificilmente por cumpli cu ultimatum di e operadornan nobo di ex Aura Casino, Island Gaming. Asina abogado pa e sindicato, Hose Figaroa a sigura NoticiaCla.com diabierna mainta. Segun Figaroa, nan a tuma nota diahuebs di e ultimatum, confirmando e informacion di e portal aki di ayera, pero a manda un contesta tambe bisando cu e ultimatum ta 'irealistico' y cu pa mas tarda dialuna, e sindicato por duna e operadornan nobo e contesta riba nan puntonan. Esey ta encera cu pa dialuna, por bisa nan si e sindicato ta laga e caso contra e operador cay, y si e trahadonan ta acepta e deal pa e 19 trahadonan cu no ta sigui cu e compania. E otro 25 a deal directamente cu e operadornan y lo a bay di acuerdo cu nan parti di e deal, manera cu e portal aki a raporta ayera. 

OFERTA RICIBI 

Segun Figaroa, ta apenas awe mainta diabierna nan a ricibi e oferta referente e 19 trahadonan y ta irealistico pa pensa cu awe mes por bay di acuerdo of por lo menos contesta e compania. Lo haci nan best pa keda cla mas liher, pero a informa e grupo caba cu no por spera un contesta diabierna, esta awe, manera cu e operador a laga sa. E deal cu e sindicato a ricibi awe mainta, ta netamente regarda e 19 trahadonan cu no ta keda cu e compania. Contrario na declaracion di e representantenan di e operador, di cu lo 'yuda unda cu nan por cu e trahadonan', Figaroa ta papia di un deal 'concreto'. Kico exactamente e deal concreto e ta nifica, no por a bisa ainda. 

ULTIMATUM

Pa loke ta e ultimatum, Figaroa a admiti cu enberdad, manera cu e portal aki a raporta caba, diahuebs nan a ricibi carta di abogado di e operador, cu e ultimatum ta pa awe diabierna pa tanto laga sa si ta laga e caso sumario cay y pa acepta e deal. Di otro forma, e posibilidad ta grandi cu e operadornan lo no ta interesa mas y lo bandona e deal completo. Esey a nifica fin tambe pa e posibilidad di trabou pa e 25 trahadonan cu si lo haya trabou, pero tambe pa e otro 19 trahadonan cu lo a haya un deal awor tambe, aunke cu nan no ta keda cu trabou.