Island Gaming su ultimo oferta na FTA ta vence diabierna

ORANJESTAD - E operadornan nobo di ex Aura Casino na Occidental Hotel, Island Gaming, a presenta nan ultimo oferta na e sindicato FTA. E oferta ta condiciona na e hecho cu e sindicato retira e caso cu tin contra nan, y e sindicato tin te diabierna awor (mayan) pa dicidi. Si e dos puntonan aki no wordo acorda, e deal no ta sigui y tin chens cu e operadornan ta bula afo. Awe mainta e representantenan di e operador nobo a confirma esaki pa NoticiaCla.com. 

E PROPOSICION

E proposicion ta ensera entre otro cu di e 44 trahadonan, Island Gaming ta tuma 25. Ta tuma nan den servicio entrante 1 di november proximo. Ta planea un 'soft opening' pa dia 15 di november, sigui pa e apertura oficial 25 di november. Pa loke ta e beneficionan laboral pa e 25 trahadonan, nan ta keda cu nan mesun salario y beneficio, y (envez di 10 luna) ta haya 2 luna extra di salario como 'overbrugging'. Esaki ta e deal cu Island Gaming ta dispuesto pa ofrece, pero cu e condicionan ariba menciona. Segun e representantenan, e enfoke awor ta e 25 empleadonan. E otro 19 trahadonan e compania lo kier haci tur esfuerso pa asisti nan pa otro empleo otro caminda. Segun e representantenan, e ta un realidad desafortuna, pero cu nan ta purbando di scapa mas cu por.

CHENS PA BULA AFO

Manera e portal aki a raporta e siman aki caba, a bin compronde cu si no tin un solucion pa fin di siman aki (pa e problema di Aura Casino),tabatin chens cu lo no tin un casino mas poniendo e futuro di e casino na peliger. Esey ta e mensahe cu NoticiaCla.com a ricibi di e representantenan di e doñonan nobo di e casino. Esey ta nifica cu cos por ta pega, unda cu e doñonan no ta dispuesto pa warda mucho mas. Manera cu nan a bisa, nan kier un solucion pa e fin di siman aki, sino nan ta bula afo. Pero a compronde cu e situacion a bira asina, door cu e hotel a pone presion tambe riba nan. 

E SITUACION CU E CASINO

Manera ta conoci, e grupo nobo ta den deliberacion cu e trahadonan cu nan lo a tuma (25) y tambe kier yega na un acuerdo cu e otro trahadonan. Pero aparentemente tin un desacuerdo cu e sindicato FTA, ya cu e sindicato a para ariba pa hiba e operador corte pa asina forsa e compania nobo pa cumpli cu e acuerdonan segun leynan laboral. A trata parti di e caso siman pasa, y ainda falta pa e resultado di e caso. A compronde di parti di e representantenan di e doño nobo cu no ta corecto cu ta hiba nan corte, mientras cu nan ta den pleno negociacion. Sindicato a declara na NoticiaCla.com caba un tempo cu nan ta conciente di e consecuencia cu por tin si nan bay Corte. E posibilidad cu e doñonan nobo por bula afo, ta conoci pa e sindicato y nan ta acepta esey. No ta un situacion cu nan kier, pero ta e realidad.