De Meza: Parlamento por haya documentonan CITGO solamente 'ter inzage'

ORANJESTAD - Gobierno no por honra peticion di Parlamento di Aruba pa duna ehemplarnan di e contracto entre CITGO, Valero y gobierno pa nan por studi'e riba nan mes, den un otro forma cu no ta 'ter inzage'. Asina minister di energia Mike de Meza a contesta presidente di Parlamento Mervin Wyatt Ras diamars atardi pa medio di un carta (parti 2). Motibo duna, manera anteriormente informa na juni, ta cu tin e peliger cu por reproduci esaki sea digital of escrito, cu consecuencia cu ta perhudica partidonan envolvi. E hecho cu a pone dos coordinador di gobierno constant presente pa supervisa e fraccionan, no a cay den bon tera cerca fraccionan di MEP y Democracia Real, pero si di fraccion berde AVP. 

Segun de Meza, cualkier acto asina lo viola e acuerdo di confidencialidad entre gobierno, Valero y CITGO. Cualkier reparticion di e documentonan por atacha e interes cu tin entre ambos compania (Valero y CITGO) contra e financiadornan, partidonan comercial, y asina perhudica nan pa loke ta e informacion confidencial comercial cu nan a presenta na gobierno, bou di acuerdonan di confidencialidad. 

Manera cu gobierno a propone pa e documentonan wordo presenta pa informacion, (den biblioteca di Parlamento for di awe te cu dia cu e ley wordo trata entre 8-5pm), e tin siguransa cu tur parlamentario por studia, lesa y investiga e contractonan suficiente, sin cu e interes huridico y economico di partiodnan por sufri daño. Como tal un biaha mas de Meza ta rechasa pa duna e documentonan liber sin mas pa e parlamentarionan.