Fraccionan frustra cu 'inzage' documentonan CITGO

ORANJESTAD - Mientras cu e documentonan pa e concepto di ley di CITGO y Valero a yega Parlamento, tabatin discordia riba e forma con esaki ta bayendo. Fraccionnan di MEP y PDR particularmente no ta nada contento cu nan por haya 'inzage' riba e documentonan bou di 'supervision' di dos coordinador di gobierno. Fraccion di AVP di otro banda, no tin e problema di supervision di documento, segun su lider di fraccion. Di banda di gobierno NoticiaCla.com a haya confirma cu e modus operandi aki tabata necesario pa por garantisa na nomber di Valero y CITGO cu e documentonan no ta wordo reproduci ni cu nan ta bay mas leu cu Staten'. 

PRESIDENTE PARLAMENTO

Segun presidente di Parlamento Mervin Wyatt Ras a confirma na NoticiaCla.com, gobierno en berdad a entrega e documentonan di CITGO ter inzage pa miembronan di Parlamento bay door di nan. "Despues di un senjoren convent, lidernan di fraccion a bisa cu nan tabata kier stukken pa cada un nan fraccion".

COMENTARIONAN EN GENERAL

Comentarionan rond ta mustra indignacion riba e acto aki. "Esaki ta frustra e trabou di e organo mas halto di representacion di e pais", tabata un di e reaccionan. Sin suficiente bista y tempo di preparacion, ta imposibel pa un parlamento por haci su trabou corecto. Sigur si ta ora cu ta traha di algo cu lo por tin asina hopi implicacion pa e pais y generacionan di futuro. 

MEP

Di parti di MEP, e fraccion tabata hopi rabia riba e tema. "Awe porfin parlamentarionan mag di "mira" e 2000 pagina di contract di Citgo. Presidente di parlamento sra Wyat-Ras ta nenga pa duna nos copia. Nos mag di sinta "wak" nan bou vigilancia di dos coordinador di gobierno (na man drechi riba e potret). Pa colmo nos ta haya dos dia so pa prepara pa reunion cu nan kier yama pa diahuebs. Wak ta bou di ki circumstancia nos mester traha, si en caso nos kier haci nos trabou drechi" e fraccion a laga sa via rednan social. 

DEMOCRACIA REAL

Di parti di e fraccion di Democracia Real, Andin Bikker a mustra cu a wordo palabra den seniorenconvent di awe mainta cu lo pidi copia di e documentonan pa cada fraccion, fuera di esey PDR a pidi dos documento mas cu RvA ta referi na dje den p. 1 di e advies, dus nos fraccion ta sali di punto di bista cu lo haya copia, sino nos lo pidi Gobernador pa intermedia paso e ley ta pidi Parlamento pa e.o. duna aprobacion na e acuerdonan" Bikker a bisa. "Ademas si Raad van Advies a haya copia di tur documento, Staten como un Hoge College van Staat tambe tin derecho pa haya copia" Bikker a bisa. Y segun Bikker a palabra cu ' lo haya copia nada di sinta na mesa cu coordinador ta wak. Nos no ta mucha chikito' Bikker a finalisa bisando. 

REACCION AVP

Lider di fraccion di AVP Rene Herde: "Den nomber di fraccion di AVP ami a propone e procedura pa trata e ley pa apertura di e refineria. A tuma gobierno hopi tempo pa cera acuerdonan cu ta na beneficio di Aruba cu e dos companianan. Raad van Advies tambe a duna su conseho y gobierno a tene cuenta cu e consehonan di Raad van Advies. Y aunke nos tin pura pa pone e refineria den condicion pa opera, nos ta haya cu Parlamento mester haya tur informacion y tur documento pa e por duna su autorisacion na e contractnan y aproba e ley.

E procedura cu mi a propone ta sigura cu gobierno pa pone tur documento na disposicion di Parlamento, sin viola e acuerdo y palabracionnan cu a haci cu e dos companianan pa loke ta confidencialidad di informacion di nan companianan priva. E procedura cu nos a propone y cu a wordo discuti, ahusta y aproba awemainta door di tres di e cuatro fraccionnan, ta sigura cu tur miembro di parlamento ta haya suficiente tempo pa studia tur e documentonan. Diahuebs atardi tur fraccion ta entrega nan preguntanan skirbi. Gobierno ta contesta mas tanto posibel skirbi. Loke no wordo contesta skirbi ta wordo contesta den e Reunion Publico pa henter pueblo wak y tende tur cos.

No por tin y no tin den e procedura aki niun secrecia pa Parlamento. Loke si nos mester sigura ta e confidencialidad di e informacion di e companianan cu cua a cera contracto. Ta p'esey tur miembro di Parlamento di tur fraccion ta haya tur informacion, pero den un forma cu niun informacion confidencial ta wordo saca. E supervision no ta stroba niun hende di lesa tur cos, di studia tur cos, di haci anotacion di tur cos cu nan lesa. Pero no por saca foto of copia di e documentonan. Miembronan di Parlamento cu ta representa tur seccion di comunidad, ta haya asina TUR informacion y alabes nos ta sigura cu niun informacion confidencial ta sali afo"