Prome miembro nobo AHATA pa directiva di ATA ta conoci

ORANJESTAD - E prome di 3 miembro di directiva cu ta representa AHATA ta conoci. Despues cu fin di juni pasa AHATA a retira nan tres miembronan 'en bloc', a keda un bashi pa un periodo. Minister di turismo Otmar Oduber a confirma na NoticiaCla.com cu awor AHATA a manda 2 prome (di 6 nomber rekeri pa ley) nombernan, di cual el a aproba uno caba. Ta trata di e CFO di CMB, esta Lionel de Cuba. 

E CASO

Tabata fin di juni ultimo cu representantenan di AHATA den e board di Aruba Tourism Authority (ATA) a retira nan sosten 'en bloc' diaranson. Pa medio di un carta cu NoticiaCla.com a tuma nota di dje e momento ey, e tres miembronan cu ta representa AHATA den e board, Joe Najjar (La Cabana), Jim Hepple (AHATA) y Javier Wolter (CMB) a informa ATA pa medio di e carta, cu nan no ta forma parti mas di e directiva. Motibonan no tabata specifico, pero tin un cantidad di asunto cu a conduci na e desicion 'abrupto' aki. Esnan cu ta keda aden tabata Simon Arends, Myrna Jansen y Peter de Hoop hunto cu e presidente Jossy Lacle.