AHATA a retira nan sosten 'en bloc' for di directiva di ATA

ORANJESTAD - Representantenan di AHATA den e board di Aruba Tourism Authority (ATA) a retira nan sosten 'en bloc' diaranson. Pa medio di un carta cu NoticiaCla.com a tuma nota di dje, e tres miembronan cu ta representa AHATA den e board, Joe Najjar (La Cabana), Jim Hepple (AHATA) y Javier Wolter (CMB) a informa ATA pa medio di e carta, cu nan no ta forma parti mas di e directiva. Motibonan no tabata specifico pero tin un cantidad di asunto cu a conduci na e desicion 'abrupto' aki. Esnan cu ta keda aden ta Simon Arends, Myrna Jansen y Peter de Hoop hunto cu e presidente Jossy Lacle. 

CONFIRMACION DI PRESIDENTE 

Presidente di e directiva Jossy Lacle a confirma na NoticiaCla.com diaranson anochi solamente cu enberdad el a ricibi e carta di retiro. "Si, mi por confirma cu mi a ricibi e carta" Lacle a bisa NoticiaCla.com. Pero el a opta pa no duna mas comentario riba esaki te cu proximo aviso. Pa loke ta e otro miembronan, Jim Hepple a bisa solamente cu e no por discuti e asunto pa motibo di ta mara na un acuerdo di confidencialidad. E otro miembronan no tabata disponibel. Directora di ATA, Ronella Tjin-Asjoe tabata breve tambe den su reaccion." Mi a tuma nota di e carta y lo reuni cu esnan concerni, y dialoga manera semper, cu semper den mente bienestar di nos turismo, incluyendo tur socio". 

MOTIBONAN PA E RETIRO

Mientrastanto NoticiaCla.com a compronde cu entre e motibonan di e retiro abrupto, por a compronde cu nan no ta contento cu e maneho actual den ATA, e falta di respet di minister (di Turismo) pa loke ta e situacion di all inclusive y algun otro asunto cu ta andando den ATA.  

CONSTELACION DI E BOARD

Manera e board di ATA ta(bata) forma, tin 7 miembro total. Di e 7 miembronan tin 3 di AHATA, 3 di gobierno y entre nan 6, ta eligi un presidente, cu ta ex director di WEB Jossy Lacle.