Minister de Meza recuperando despues di operacion di cateterisacion

ORANJESTAD - Minister Mike de Meza responsabel pa e cartera di utilidad, energia y comunicacion a haci operacion di cateterisacion dialuna ultimo. "E ta na cas caba y ta recuperando" ta informacion cu NoticiaCla.com a ricibi di fuentenan cerca di e mandatario. E mandatario a drenta hospital diadomingo ultimo, a wordo opera dialuna y ta na cas awe diamars. "E ta riba medicamento y mester biba un bida mas saludabel. Menos trabou, mas descanso" e fuente a sigui bisa. Sinembargo cos ta mustra cu esey lo ta dificil. A compronde cu e mandatario tin reunionan programa pa e siman aki caba. 

INTERNA LUNA PASA 

Tabata fin di juni (23 di juni) ultimo cu e mandatario a pasa den un susto ora cu diripiente el a haya dolor di pecho y a keda hospitalisa mesora. Miedo tabata cu e lo a sufri un atake cardiaco of tabata na caminda pa uno. Afortunadamente esaki no tabata e caso y despues di algun tempo e por a bandona hospital, pero cu e intencion di haci un 'follow up' medico. Esey a sosode e siman aki mirando cu a resulta cu e mandatario su situacion tabata mas serio di loke a kere. NoticiaCla.com ta desea e mandatario pronto recuperacion.