Minister Mike de Meza a bandona hospital awe tardi

ORANJESTAD - Minister Mike de Meza a bandona hospital awe tardi. "El a wordo 'ontslagen' cu conseho pa un cambio di 'lifestyle' y cu remedi pa reduci factornan cu e tin pa un malesa cardiovascular". Asina un familiar a confirma na NoticiaCla.com. Esey sigur ta bon noticia, aunke cu e mandatario a sufri un susto grandi un dia prome. 

SUSTO DIAHUEBS

Minister Mike de Meza tabata interna den Hospital, for di diahuebs anochi, pero tabata spera cu e por sali ya caba diabierna. Asina minister presidente Mike Eman a declara diabierna mainta durante un conferencia di prensa. E momento inicial a causa poco panico entre coleganan segun Eman, ora cu e noticia a bira conoci di e malestar diripiente di e mandatario. Ainda no ta conoci kico a conduci na e malestar di de Meza, pero ta indica cu tabatin indicacion cu posibel problema cardiovascular of indicacion cu por conduci na un problema asina.