Andin Bikker ta refuta interpretacion di Antiliaans Dagblad riba ferry

ORANJESTAD - E servicio di ferry entre e islanan ABC ta enteramente posibel. Asina parlamentario Andin Bikker a reacciona na NoticiaCla.com diamars, contra arestando e interpretacion di e vespertino Antilliaans Dagblad su conclusion di e rapport riba e ferry. "(Antilliaans Dagblad) su conclusion di e rapport ta prematuro y incorecto" Bikker a cuminsa na bisa. "E  aparente conclusion negativo di e articulo di awe referente fast ferry (manera publica pa Antiliaans Dagblad y reproduci pa e.o. NoticiaCla.com) den mi opinion ta prematuro y incorecto". 

META DI E RAPPORT

Segun e parlamentario, prome cu tur cos e rapport ta traha pa indenfitica cual ta e obstaculonan cu mester wordo adresa, dus ta logico cu lo tin retonan ta wordo menciona den e rapport. Pa di dos ta na Gobiernonan y e respectivo Parlamentonan pa agilisa e obstaculonan cu wordo identifica. "Por ehempel pa loke ta trata e waf ideal, cu ta na pa e ferry sali y yega na San Nicolas como punto mas cerca di Corsou, Gobierno di Aruba ta tumando esey den consideracion" Bikker a bisa. Pa loke ta trata proceso pa e ferry por sali y drenta mas liher ("turn around"), tin solucionnan pa esey y ta depende tambe con regular kier pa un ferry por nabega entre e islanan. "Si kier pa e bay tur dia bini bek mester purba pa baha e tempo di "turn around", pero si ta tres of cuatro biaha pa siman e ta bay duna servicio e turn around por ta un poco mas largo" e parlamentario a sigui bisa. 

FALTA DI SERVICIO AWO

Bikker ta sugeri pa wak e situacion asina: actualmente no tin ningun servicio entre e islanan di ferry. "Mi ta sigur cu hopi ciudadano lo ta contento cu un servicio di maske tres pa cuatro biaha pa siman, compara cu e situacion actual cu no tin nada". Y segun Bikker, tanten cu den e poblacionnan di e islanan ta existi un deseo pa miho conexion entre e islanan, e ta kere cu ta un tarea di nan representantenan pa keda explora e posiblidadnan te unda cu por y kita obstaculonan innecesario." Pues di nos banda nos lo sigui cu mente positivo traha a base di e mocionan adopta den e respectivo Parlamentonan y e palabracionan haci durante IPKO (interparlementair Koninkrijks Overleg).