Proyecto di ferry por cay na awa prome cu tempo

WILLEMSTAD/ORANJESTAD - E plan di un 'fast ferry' entre e islanan ABC, ta parce di por fracasa prome cu tempo. Asina e matutino 'Antiliaans Dagblad' ta raporta awe. Nan a pone man riba un rapport di factibilidad di e compania Icasus Caribbean cu a traha esaki riba peticion di e tres gobiernonan. Ta trata di rapport,  ‘Ferry Onderzoek Inter-Caribische Expressdienst’ (Foice). Problema cu localidad pa pone e ferry, tarifa sugeri, tempo di biahe cortico y e burocracia di islanan lo stroba e meta principal di e ferry, cu ta pone cu proyecto por fracasa. 

TEMPO CORTICO

Por ehempel a pone cu e tempo di biahe mester ta mas cortico posibel. Pero debi cu e islanan no por duna e localidadnan sugeri (a sugeri otro localidad), no por garantisa e tempo cortico di e ferry (e mester mara caminda mas largo cu ta haci e distancia mas leu). Pa Aruba a sugeri pa mara na San Nicolas, pero gobierno a apunta Paardenbaai (waf na Playa). Un adaptacion di e waf na San Nicolas lo mester costa 10 miyon extra cu tabata plania. Bonaire ta mas problematico ainda pasobra lo mester construi henter un waf nobo. 

BUROCRACIA

E burocracia tambe ta hunga un rol. Aruba p.e.no por sigura un controle lihe di imigracion y douane. Como tal e rapport ta sugeri pa e tres islanan incorpora nan propio 'Fast Ferry and Economic Zone'. 

TARIFA ABOU NO ALCANSABEL

Mientras cu e plan tabata pa cobra 10 dollar pa un 'one way trip' y 25 dollar pa transporta un auto, e prijsnan en realidad lo ta mucho mas halto. Un retour entre Aruba y Corsou lo costa 110 dollar, y entre Bonaire y Aruba 140 dollar, aproximadamente mitar di un pasashi. Debi cu e biahe ta bira mas largo, ta bira dificil pa un hende biaha bay bin riba e mesun dia, cu ta trece mas gasto di estadia 'overnight' cu ne. 

OPTIMISTA TOCH

No obstante e puntonan negativo, e rapport ta haci mencion di puntonan positivo.  Entre nan, e proyecto por tin un impacto economico y social enorme. E por crea empleo directo pa 120 hende y indirectamente 600. Ta premira cu por lo menos 455 pa 600 hende lo por haci uzo di e ferry, di cual ta premira cu un kwart lo ta turista. Tambe ta mustra cu lo mester ehecuta esaki den un forma di un PPP proyect, esta un Public Private Partnership. E proyecto por ta operacional si lease e bapor, y si tin cu cumpra uno, e lo dura 9 luna adicional.  

IDEA DI FERRY

E idea di ferry a bin durante un reunion di IPKO (Inter Parlementair Koninklijk Overleg).