No tin ningun toezegging ariba tereno bashi riba waf

ORANJESTAD - E alegacion di Glenbert Croes di MEP cu tin complot pa loke ta espacio riba waf, y cu lo a entrega espacio caba na compinchi no ta berdad. "Puro fabeltjes, redashi, y purba(ndo) di susha nomber di hende" ta e reaccion di minister Benny Sevinger riba e tema ey. Manera ta conoci NoticiaCla.com a raporta prome cu Croes a acusa Sevinger di e asunto di partimento di 20 lot riba waf. "Si nan tin prueba di esey cu nos a duna hende e terenonan eynan caba, y cu nan a pasa notario, nan por bay hypotheek kantoor" e mandatario a sigui bisa. 

TERENONAN PROPIEDAD DI APA

E mandatario a splica cu e terenonan cu a bira limpi y cu Croes ta referi na dje, ta tereno cu ta di APA (Aruba Ports Authority). Infrateam, APA y Ports Amsterdam ta trahando un business plan con tin cu desaroya e terenonan cu a bira bashi recientemente (cu tabata riba tereno di freezone). Segun e mandatario, APA a cumpra e terenonan aki e tempo ey for di diferente doño cu tabatin, pa mas di 18 miyon florin, y awor APA kier e placa cu el a inverti, bek. E plan di APA ta pa crea diferente plots, unda cu tin mas di 30 interesado pa desaroya esaki. "Tin un comision cu lo evalua cada un di e peticionan pa desaroya ey" e mandatario a bisa. Lo dicidi ken ta haya e terenonan aki a base di e criterionan stipula. Entre nan, tin cu kico cu wordo traha, no por influencia Caya Grandi. Pues nada di centro comercial. Tambe tin cu e business plan mester ta aproba, y e placa di inversion tin cu wordo controla pa Banco Central. "No tin ningun toezegging ariba terenonan ey. Ta di APA nan ta" e mandatario a sigui bisa.