Re-aloca 'Santana di Cacho' no ta prioridad mas pa DIP

ORANJESTAD - Re-alocacion di e santana di cacho no ta un prioridad mas pa Directie Infrastructuur en Planning (DIP), pero esey no ta nifica cu cos no ta bay cambia eynan. Asina miembro di management team di e departamento, Isabel Dammers a sigura NoticiaCla.com. E siman aki ta un aña pasa cu Dammers a informa e portal aki cu mester a realoca e santana debi na plannan di desaroyo turistico. E tempo ey e tabata un prioridad halto. E noticia aki a crea un ola di critica y siman pasa, un aña despues atrobe e sentimentonan aki a bin dilanti. Mirando sinembargo cu e plannan turistico no ta vigente mas of no actual, no tin pura mas pa realoca e santana. 

MUDAMENTO ACOPLA NA PLAN TURISTICO

Segun Dammers, e mudamento pues tabata acopla na e hecho cu esaki ta parti di e opcion cu a wordo duna pa e desaroyo turistico riba e klip na Seroe Colorado na e parti na halto. "Sigur den e caso di Bahia Principe, tabatin opgenomen cu e area lo wordo opgeschoond, cu lo mester a realoca e santana di cacho" Dammers a bisa. Pero debi cu e desaroyonan rond di e hotel ey tabata relativamente keto mirando e noticianan rond di e reapertura di e refineria, tabata mustra cu e desaroyadonan no tabata interesa mas den e desaroyo di hotel. "Nos no sa kico ta berdad den esey. Mi no a mira verdere ontwikkeling di e hotel. Cosnan ta un tiki keto" Dammers a sigui bisa. "E issue di e relocacion ta riba un zacht pitje".

PRIORIDAD 

E asunto sinembargo ta keda si riba mesa cu mester haci algo. "Si no ta realoca, ta sanea si. E no ta deseabel den bista di desaroyo turistico" Dammers a sigui bisa. Kehonan riba e expansion di e deramento ta hopi. Tanto departamento di salud como polis di bario a avisa cu ta derando bestia pa loco y no ta sosode na un forma corecto. Hende ta coba buraco apto pa deramento mientras cu otronan ta hopi 'oppervlakkig' y tapa e bestia cu santo cu tur consecuencia. "Nan a trece na nos atencion cu mester 'dam e in' ". Na e e santana bo tin un beach unda cu hende ta campa tambe. Pues mester busca un solucion p'e. 

DERAMENTO DI BESTIA DEN EXTERIOR

DIP a cuminsa mira si den exterior con e deramentonan aki ta sosode. E no ta nada inusual segun Dammers, cu tin santana pa bestia unda cu ta wordo dera manera un santana normal pa hende. Ta practica comun na varios parti na mundo, pues tin cu busca un solucion pa esaki tambe. Y si haci esaki (e realocacion), mester haci esaki na un lugar central y accesibel cu tur hende por yega na dje na mes manera. No tin un sitio den mente aworaki pa DIP, unda cu e santana 'nobo' lo mester bin.