DIP: Tin cu re-ubica Santana di Cacho pa otro lugar

SEROE COLORADO – Gobierno ta evaluando pa move e conocido ‘Santana di Cacho’ pariba di Baby Beach, pa un otro sitio. E sitio nobo no ta conoci, segun directora di Directie Infrastructuur en Planning (DIP) Isabel Dammers a splica NoticiaCla.com recientemente. E situacion, -manera cu por a constata na e santana-, a bira ‘intolerabel’. Y den opinion personal di Dammers, el a bira un situacion ‘a-higienico’. Como tal, ta evaluando con pa soluciona e problema aki. E tempo ta mara na e desaroyo turistico na caminda (entre otro Bahia Principe, aunke cu Dammers no ta menciona e grupo aki specifico) aki un par di luna.

SANTANA GRANDI

Durante curso di añanan, e santana a crece y bira algo hopi grandi. Hendenan a bira mas conciente di nan mascotanan y no ta djis deshaci di nan ora cu nan muri, sino ta duna nan un entiero respetuoso na e santana. Pero mirando cu tin un desaroyo turistico na e area ey, ‘un di e condicionnan di e desaroyadornan, ta cu e santana di cacho mester wordo hala’ Dammers a sigui bisa. Tanto for di punto di bista di DIP (pa e situacion higienico) como di desaroyadornan a bira tempo pa hala e santana for di eynan.

ALTERNATIVA

Dammers ta conciente cu si kita e santana, mester bin cu un alternativa. “Si bo kit’e y no brinda alternativa, nos tin un problema”. Ta bon si un hende (of instancia) por pensa riba un tipo di crematorium pa animal, of si ta bay traha un otro santana pa cacho, cu ta controla cu por wordo usa unda cu tin grafnan coba caba.

PROHIBICION

Ainda no ta asina lew sinembargo cu tin prohibicion pa dera cacho na e santana na Seroe Colorado, pero ta cos cu mester wordo soluciona den lunanan cu ta bin aworaki . Asina cu e erfpacht wordo otorga na cualkier desaroyado turistico cu tin cu bin pariba, e mester wordo ‘opgeschoven’. “E ta cuestion di lunas, y no añas. No tin lugar ainda y ta buscando un lugar strategico pa por re ubica e santana actual. “Awor e ta hopi pariba. Porta tin cu centralise, y pensa riba e ‘ondergrond, e bereikbaarheid etc” Dammers a bisa.

OPSCHONING

Ora cu papia di cu tin cu sera e santana, y re ubik’e, ta papia, segun Dammer, di un ‘opschoning’. Esey ta nifica cu lo tin cu coba y saca tur e cadaver di e cacho(y pushinan) dera eynan y hiba nan otro caminda. “Bo no sa kico tin dera na unda. Ata bo ta bay cana den un area turistico, bo ta kere cu bo ta hunga den santo blanco, y ata bo ta dal den cadaver di cacho” Dammers a bisa. Como tal no ta considera esey como algo aceptabel den un cuadro turistico tampoco. Lo haci e deramento na otro lugar den un forma respetable, hunto cu e doñonan di e bestianan. Con exactamente kier haci esaki, no ta conoci. Loke ta conoci, ta cu dentro di algun luna, e santana tin cu bay.