Nada a bay robes den toren di control contra piloto

ORANJESTAD - "Na ningun momento no a ricibi ningun rapport di un for di ningun piloto/ aerolinea of controlado di trafico aereo, cu ta duna e indicacion cu algo lo por a bay robes riba e fecha 24 juli 2016". Asina den un mensahe cortico, departamento di aviacion civil (DCA) a reacciona riba e informacion cu a keda publica e siman aki riba keho di un piloto riba e operacion di toren di control di nos aeropuerto. Y mirando cu no tin dato di e keho, DCA no por haci un investigacion, pasobra no tin un rapport.

FALTA RAPORT 

Segun DCA, motibo cu nan no por investiga e caso aki, sin cu tin un rapport traha, pasobra 'no tin e dato nan necesario (dia, ora, tipo di avion, aerolinea, altura etc.) pa asina determina si regla(nan) di aviacion a wordo viola y ki ta e medidanan preventivo cu mester wordo tuma". Sinembargo, manera cu NoticiaCla.com a raporta inicialmente, 'asina mes personal di Departamento di Aviacion Civil a scucha e grabacion di full e dia encuestion y a deduci cu tur cos a bay segun reglanan di aviacion". Y finalmente, DCA ta mustra cu nan 'semper ta percura y lo sigui percura pa Aruba su espacio aereo ta uno sigur'.

REACCION MINISTER

Den un reaccion cortico pa NoticiaCla.com, minister di transporte Otmar Oduber a bisa"Ami ta confirma boso cu ningun rapport of keho a wordo haci na Aviacion Civil". "Sinembargo mi a pidi un rapport y investigacion di parti di Aviacion Civil y esaki lo mester ta cla pa mayan mainta!", refiriendo na diahuebs mainta.   

REACCION DI ANSA

Contrario na e keho di cierto pilotonan riba personal di toren di control, manera un website a relata e siman aki, ANSA cu ta e departamento responsabel pa toren, ta sigura cu nan no a haya ningun keho oficial. E website a raporta un incidente cu lo a sosode diadomingo ultimo.  Pero awor ta resulta cu lo no tabatin nada.  "Update cu mi tin di ayera tardi (26-7-16) ta cu nos no a haya confirmacion di parti di nos controllers cu en berdad un incidente manera describi den e articulo a sosode" director di ANSA, Nilky Kock a sigura NoticiaCla.com. De hecho, nan tin prueba cu nada no a sosode. "Loke nos por a confirma mediante scuchamento di tape ta cu un eventual incidente sigur no a sosode diadomingo ultimo" Kock a sigui bisa. 

GRABACION

Den combersacion adicional cu e director interino di ANSA, Erika Dedier, e ta splica cu e grabacion cu Kock ta referi na dje, enberdad no tabatin nada straño. "No tabatin nada fuera de lo comun. Riba e frecuencia di (toren) pa loke ta lack of language, of separacion (di avion) tur cos a bay normal manera mester ta" Dedier a bisa. Si algo lo a bay robes, lo mester a raporta esaki via e canalnan oficial, pero esaki no a sosode. "Nada no a drenta cerca nos. Esaki ta djies un hearsay" Dedier a sigui comenta. A confirma cu tabatin suficiente personal y cu tur hende a traha manera mester ta y cu nada no a bay fout.  

FALTA DI PERSONAL

E hecho cu lo tabatin falta di personal, manera cu un aeroliña a splica NoticiaCla.com den nos raportahe, tambe ta wordo desmenti pa Kock."Loke mi mester refuta sigur ta cu segun algun compania aereo nos tin un falta di personal den toren na Aruba. E informacion ey ta totalmente eroneo y falso", Kock ta cuminsa bisa. "ANSA na tur momento tin suficiente personal den toren y mi ta haya straño cu linea aereonan ta pretende cu nan por duna opinion over di ANSA su personeelsbezetting. Cu mi en todo caso ningun linea aereo a tuma contacto pa puntra mi si nos tin suficiente personal. Dus mi ta wonder kico ta nan fuente di informacion" Kock a finalisa bisando. 

DAÑO NA ANSA Y TOREN

E problema cu tin awor ta cu e informacion a wordo publica internacionalmente y a wordo hopi plama rond, local e internacional, cu e consecuencia cu e ta daña e reputacion di toren di Aruba y tambe nos isla como un isla sigur pa aviacion y turismo. Pero intentonan pa comunica cu e website, no tabata exitoso. "E ta un site cu bo no por haya acceso na dje. Y ademas e ta djies un airline, un 737. Na Aruba tin varios 737 (tipo di avion) ta bulando, dus cu ken bo ta bay refuta esey. Di mi parti mi a manda un mail pa e site, pa haya mas informacion, pero no a haya ningun reaccion" Dedier a bisa. No por papia ni di un dia robes. "Si esey ta e caso, nan mester tin nan informacion corecto, pasobra si bo ta bisando riba diadomingo el a pasa, mi por bisa cu riba diadomingo net nada no a pasa, y tur cos a bay manera mester ta." NOTA e foto ta cortesia di  www.navcanada.ca