Pilotonan cu critica riba toren di control di Aruba

ORANJESTAD - Tin un situacion peligroso desaroyando na aeropuerto, specificamente e comunicacion entre toren di control cu e avionnan (primordialmente avionnan Mericano posiblemente). Esaki segun un relato di e website caribaviation.net cu ta raporta un incidente cu a sosode diadomingo ultimo na Aruba. Y for di e relato, e ta refleha no solamente un incidente di problema di comunicacion isola, sino un patronchi structura di varios incidente riba un solo dia. For di aeropuerto su gerencia a compronde cu nan mes a tuma nota di esaki riba internet y no tabata na altura di e asunto. Departamento di aviacion civil a tuma nota di esaki y a priminti un reaccion. 

BREAKDOWN DI COMUNICACION

E relato ta papia di un incidente cu un capitan di un boeing 737 a experencia cu un controlador area di trafico na Beatrix Airport diadomingo ultimo, 24 di juli. E ta papia di un solo persona cu tabata atende cu varios cos pareu: ground, toren, departure, approach, clearance delivery etc, y tur den un ambiente unda cu no tin radar. Manera ta conoci den mundo aviacion, na lugarnan manera Merca, cada un di e 'cosnan menciona', ta wordo atendi pa diferente departamento. Na Merca un departamento ta comunica cu e avion riba tera (Ground), despues dado momento ta pas'e pa toren (ora cu ta cla pa subi e active runway), y asina por sigui. Na Aruba, e un persona ta haci tur cos. Pa completa e obra, ta critica e aspecto di idioma ingles cu no tabata 'cualifica', falta di pronunciacion corecto, cu a conduci, segun e capitan, na hopi intento pa ripiti, enuncia, comunica mas lento, 'pero ni asina, e controlador area no a cumpli y of mehora su prestacion'. 

CONFUSION

Dado momento e controlador aereo lo a informa di luz berde pa subi buelo, cu a trece mas confusion aun, e controlador finalmente a coregi e situacion pa basa su mes riba e ruta previamente stipula, 'pero nunca no a acepta y of confirma e situacion y e problemanan'. E capitan ta sigui conta di henter un proceso tecnico di avion, pa describi con teribel e cos tabata, pa despues bisa cu 'esaki tabata e pio maneho di control di trafico area cu mi a experencia den hopi aña". "Pilotonan no por a compronde of determina kico e controlador aereo tabata kier pa nos haci. Zero claridad, zero logica den planificacion di e controlador di metanan". 

FALTA DI PERSONAL

Den su intento di haya informacion extra, NoticiaCla.com a compronde for di algun compania aereo cu esaki ta un situacion nobo pa nan. "Semper nos por a conta ariba un servico excelente for di Beatrix tower" un a bisa NoticiaCla.com. "Loke nos sa ta cu tin scarcedad di personal den toren". Y esey ta splica tambe cu tin biaha tin momento cu aeropuerto no por opera debi cu no tin suficiente personal.