Andin Bikker (PDR): Modernisa ley di Raad van Advies

ORANJESTAD - " Mester modernisa e ley di Raad van Advies" ta reaccion di e parlamentario Andin Bikker. Bikker ta reacciona asina riba e hecho cu RvA a nenga di duna conseho riba un peticion cu el a manda. " Raad van Advies a nenga di duna un conseho adicional riba e ley di "all-inclusive" basa riba un argumento formal (dus no riba contenido) cu e peticion proponi, no a bin di un mayoria di Parlamento, pues e ora no por trat'e" Bikker a bisa. 

FRACCION MINORITARIO SEMPER MESTER DI SOSTEN

Segun e parlamentario, esey ta pone cu semper fraccion den minoria mester di cooperacion di e mayoria cu ta sostene Gobierno pa por haya un conseho adicional di Raad van Advies, cual cooperacion claro nunca lo wordo duna paso e fraccion mayoritario ta sostene Gobierno ciegamente! " Pa colmo e propio Raad van Advies ta boga den su jaarverslag 2015 pa un Corte Constitucional paso no tin suficiente garantia ("waarborg") pa e calidad di leynan na Aruba". Segun Bikker, awo cu Raad van Advies a haya un oportunidad pa duna conseho, a tuma un posicion formal y no ta bay in riba e peticion su contenido, cual ta di lamenta. Mirando esey PDR ta di opinion cu mester modernisa e art. 17 di e Ordenansa di Raad van Advies y pone na un nivel mas practico y realistico, por ehempel comparabel na e exigencia actual pa por introduci un mocion: si minimo tres miembro di Parlamento pidi pa advies, no mester cooperacion di un mayoria. 

CONSEHO DI RVA TA KEDA VALIDO

Segun Bikker, door cu Raad van Advies no a bay in riba e contenido di e peticion pa advies adcional, Gobierno no por saca conclusion cu su ley lo ta bon, paso e conseho negativo di Raad van Advies ta keda valido! " Pa colmo PDR a mustra riba mas fayo den e ley cu Raad van Advies mes a señala, pues e ta keda un ley mal traha cu entre otro 1. ta contra nos Constitucion y Tratadonan internacional, 2. lo trece cu ne cu pais Aruba lo wordo exponi na claimnan multi-miyonario y 3. cu Gobierno lo mester bay duna centenares di permiso nobo pa bar y bende cuminda dor cu tur hende cu ta huur camber, condominio, cas of appartement mester bay pidi un "logementsvergunning" (cual permiso ta duna derecho pa tin un bar y bende cuminda)". E parlamentario ta mustra cu awo ta keda e pregunta, si e ley haya un mayoria den Parlamento, si articulo 21 di Reglement voor de Gouverneur van Aruba lo wordo aplica paso, den ausencia di un Corte Constitucional (cu e propio Raad van Advies a boga p'e), no ta resta mucho otro waarborg pa cu e "calidad" di e ley den e setting actual, caminda cu Gobierno ta presiona pa e ley wordo adopta sin cambionan instrumental.