RvA ta rechasa peticion MEP y PDR pa mas consulta riba ley

ORANJESTAD - Dos diferente intento di dos diferente lider di fraccion den Parlamento di Aruba a wordo frustra y rechasa formalmente pa e organo consultativo, Raad van Advies (RvA). Un peticion ta trata e cambio di ley di all inclusive cu ta wordo trata dia 19 di augustus proximo, y e otro ta trata e maneho di minister riba MB di taxista. Pa loke ta all inclusive, esaki ta practicamente habri caminda pa minister di turismo Otmar Oduber por trata e ley sin ningun otro barera legal den caminda. Motibo principal pa e rechaso segun un carta oficial di RvA na presidente di Parlamento, ta cu e organo no ta duna conseho riba peticion 'individual' sino solamente colectivo. Y asina mes e mester ta basa riba un mayoria den Parlamento.   

ANDIN BIKKER

Un di e parlamentarionan cu ta opone e cambio di ley ta parlamentario Andin Bikker, cu siman pasa a vocifera su mes fervientemente contra e ley cu (minister) Oduber kier cambia, indicando cu mester di mas conseho y investigacion pa haya mas claridad. Y un di e armanan cu Bikker (kier) a uza, ta e peticion (adicional) na e organo consultativo. Esaki siendo cu ta conoci cu e organo ya caba a duna un conseho riba e tema aki. Den un carta separa pues, RvA ta bisa basicamente cu e motibo cu no ta honra peticion di Bikker, ta pasobra ya caba e organo a duna un conseho riba e tema ey caba, pues no ta bay haci'e un di dos biaha. Ademas, e ta contra ley di RvA, cu ta prohibi e organo pa duna conseho 'individual'.  

EVELYN WEVER CROES

E otro parlamentario cu a haci un peticion ta Evelyn Wever Croes. Sinembargo, den su peticion na RvA, a mas bien pidi pa nan investiga e 'legalidad di e ehecucion di e maneho di e mandatario' riba e tema di taxista. Pero, mescos cu den caso di Bikker, RvA a mustra cu aki tambe ta considera (aunke di un otro angulo) esaki un peticion igual y tambe di indole individual pa investiga algo, y como tal (aki tambe) ta rechasa e peticion. Den caso di Wever sinembargo, tin un punto extra cu RvA ta mustra ariba. "Den un caso asina ta un hues tin cu atende e legalidad di e maneho aki". Pues no ta na RvA pa atende cu e ley aki.  

CONCLUSION

Como conclusion, RvA ta avisa presidente di Parlamento cu ta solamente Parlamento como organo por haci un peticion pa un evaluacion di un ley, y esey mester sosode den un forma di mayoria. Como tal lo no duna conseho riba ningun di e dos peticionan. Di otro banda, RvA ta mustra si cu si Parlamento cambia su maneho y pa medio di un mocion, incorpora tur e puntonan cu ta necesario y cu ta cumpli cu e necesidad pa RvA haci un evaluacion di un ley, por haci tal. 

CONSECUENCIA

Manera indica, cu e rechaso riba peticion di e dos respectivo parlamentarionan, esaki ta practicamente habri caminda completo pa e tratamento di e ley tuma lugar otro luna. No tin nada otro cu por stroba e tratamento di e ley(nan) aki ya cu tur otro asunto lo ta cla caba. Un investigacion independiente riba e tema, haci pa Banco Central, lo no mester tranca e tratamento manera cu NoticiaCla.com a compronde.