PricewaterhouseCoopers tambe a distancia su mes di aviso riba all inclusive

ORANJESTAD - Despues cu Banco Central di Aruba y gabinete Mike Eman II a distancia nan mes di un aviso referente e ley di all inclusive, e compania PricewaterhouseCoopers a bira e proximo compania pa bin dilanti y distancia su mes di e publicacion tambe. "PricewaterhouseCoopers (PwC) kier distancia su mes y no por wordo poni responsabel pa cu e contenido di un aviso publica den diferente medionan di comunicacion siman pasa ariba e topico di all inclusive" e compania ta bisa den un comunicado awe mainta. "Den e aviso aki ta uza nomber di nos compania sin e autorisacion necesario. PwC no ta un partido den e debate publico aki" e compania ta finalisa bisando. 

OTRO COMPANIANAN A DISTANCIA

Tabata siman pasa cu gabinete Mike Eman II a distancia su mes di dos articulo citando dos minister cu ta 'pro' pa wanta tratamento di e ley di all inclusive manera ta para den un aviso publica recientemente. Despues e siman aki Banco Central di Aruba tambe a manda un comunicado distanciando su mes di e mesun comunicado. Cu esun di PWC, esaki ta bira e di tres compania/instancia cu ta distancia su mes di e mesun aviso aki. E aviso ta referi na por lo menos 11 compania/instancia cu lo kier pa para e tratamento di e ley di all inclusive te ora cu tin mas informacion disponibel of conduci.