Desenlace amienda riba union civil creando mas division

ORANJESTAD - Mientras cu e guera entre AHATA y gobierno no tin fin pa yega na un fin y mas importante, un solucion, tin un otro guera cu a cuminsa cu e biaha aki ta entre clero catolico y gobierno. Mientras cu esaki no ta 'asina cayente' manera esun di all inclusive, e ta hayando un dimension publico cu por surpasa esun di all inclusive rapidamente. Esaki ora cu den fin di siman, e señal cu a bin for di Corsou di no disculpa na e parlamentario, y e hecho cu e ultimo predicashi di pastoor Daniel Szpila no a 'tone down', no a yuda e causa tampoco. Ta trata di e amienda pa union civil entrega siman pasa pa parlamentario di AVP Desiree de Sousa Croes. Un amienda cu ta hayando un spin cu ningun hende por a spera. Y e division no ta solamente entre clero catolico y gobierno sino entre e propio partido berde. 

PREDICASHI NO A CAMBIA RIBA TEMA 

Den fin di siman, e predicashi di pastoor Szpila tabata hopi cla cu no tin ningun 'dispensa' na caminda y lo e no bin tampoco manera cu Vinda de Sousa (partner di e parlamentario di AVP) a pidi obispado na Corsou. De hecho, el a uza gran parti di su predicashi pa reitera e punto di bista di clero catolico riba e tema ey. Mes momento, dos parlamentario di e mesun partido berde a vocifera nan pensamento y tur dos tabata contra nan colega de Sousa. Esey tampoco no a yuda e situacion ey. Mes momento un otro minister di e partido berde a bin dilanti y declara su sosten na e causa di LGBT. Pues el a bira un muestra di ken ta para na cua banda. Y ta un muestra cla di un division cu ta trancando e ambiente den e partido. Den tur esey, e lider di partido a mustra su sosten pa parlamentario de Sousa y esey por crea un situacion incomodo pa hopi den e partido. 

SPERA DENUNCIA CONTRA PASTOOR

Cu e actuacion di pastoor Szpila e fin di siman aki, ta mustra cu lo por spera un denuncia contra su persona na ministerio publico. Manera cu de Sousa a declara na NoticiaCla.com den fin di siman, loke nan kier ta pa e pastoor 'tone down' su palabranan y e ora tur cos ta ok. Di otro banda, su partner a declara mas fuerte na partner di noticia di NoticiaCla.com, Ret Karibense, cu e kier un dispensa publico. Esey no a bin pues awor ta spera cu e siguiente paso lo ta pa haci e denuncia contra e pastoor. 

UN PETICION PA FIRMA

Un otro desaroyo cu a bin den fin di siman tabata un peticion pa  mustra sosten via un website unda cu hende por firma pa pone e sosten pa e lucha di e comunidad di LGBT, pa asina tin un muestra publico di sosten. Rainbow Warrior tambe tabata basta vocal den fin di siman riba e tereno aki y a publicamente mustra sosten pa e grupo aki.