De Sousa: Si pastoor tone down, ta ok sino ta haci denuncia contra dje

ORANJESTAD - "Si pastoor Daniel Szpila tone down, nos ta ok cu ne y nos cada un por sigui nos lucha cu respet pa otro. Pero si e sigui cu su haatzaaierij nos lo ta obliga di haci denuncia contra dje a base di art. 60 di nos codico penal." Asina parlamentario Desiree de Sousa Croes a bisa NoticiaCla.com diabierna mainta. Esey como reaccion riba e contesta cu su pareha Vinda de Sousa a haya na Corsou di obispado, pues cu pastoor Szpila no a haci nada malo, y no lo cumpli cu e peticion di de Sousa pa Szpila rectifica. 

REACCION DI OBISPADO

Manera ta conoci, de Sousa a biaha pa Corsou pa manda un mensahe personal na Obispado, pidiendo obispo Luis Secco pa pastoor Daniel Szpila hala su predicashi atras sino mester denunci'e. Sinembargo Obispado no a duna oido na de Sousa, argumentando cu Szpila no a haci y bisa nada robes, y ta mas bien papia palabra di Dios. 

RETIRO DESIREE CROES

Tabata e siman aki cu parlamentario pa partido AVP Desiree de Sousa Croes a anuncia su retiro for di politica.   Durante un entrevista cu e periodista di e revista Exclusivo Jacqueline Suttle riba pagina di FACEBOOK, de Sousa a bisa cu ta basta y cu esaki ta su ultimo aña cu partido AVP, y cu e no ta bolbe riba e lista y tampoco riba cualkier otro lista. Motibonan ta entre otro e reaccion di su coleganan di partido y otro partido riba e amienda cu e ta bay presenta diamars awor, pidiendo pa registracion di partnership igual pa pareha tanto heterosexual y homosexual. E otro ta e declaracion di pastor di parokia di Dakota Daniel Szpila cu ta condena matrimonio di hende di mesun sexo. Mas laat anochi de Sousa mes a confirma su retiro na NoticiaCla.com. 

DOS AÑA BRINGANDO PA DERECHO

De Sousa cu ta forma parti di e comunidad LGBT, ta casa cu un persona di mesun sexo, y tin dos aña ta bringa pa e derechonan aki. "Despues di dos aña mi no ta bringa mas" de Sousa a sigui bisa. E ta mustra cu e partido cu e ta forma parti di dje, ta dividi riba e tema aki y e ta lamenta esey. E intencion ta pa e entrega e amienda diamars na presidente di parlamento pa despues e wordo trata durante un reunion publico dia 22 di augustus ora cu trata e codigo civil nobo.