Corte: RBM Estates declara no admisibel contra gobierno

ORANJESTAD - Corte awe mainta a declara e peticion di e compania RBM Estates ,-pa entre otro ordena gobierno otorgacion di e tereno erfpacht y declara e sentencia di dia 7 di juni ultimo cu ta prohibi gobierno pa haci tal-, como 'no admisibel'. Motibo principal duna ta cu RBM a perde e opcion riba e tereno(nan) respectivo y cu e aprobacion verbal of intento verbal di minister pa prolonga esaki, no ta valido ya cu e mester ta haci pa medio di un decreto ministerial (por escrito). Como tal hues a rechasa e peticion di e compania. 

FAYO DI GOBIERNO

Corte tabata di opinion cu mientras cu posiblemente gobierno (lesa minister di infrastructura) lo a duna (segun defensa di RBM) of tabatin intencion di prolonga e opcion di tereno erfpacht (cu a caduca na januari di e aña aki), gobierno a faya door di no haci esaki pa medio di un decreto ministerial. Ley no ta permiti un 'intento verbal' of un palabracion 'verbal' di minister pa e prolongacion, y ta rekeri un prolongacion 'por escrito' esta pa medio di un MB oficial. Ya cu esaki no tabata e caso, e opcion no t'ey y como tal RBM no por basa su mes riba esey mas. Y como cu e no e opcion pa e tereno mas, su peticion ta bira 'inadmisibel'. Ademas, segun corte, e desventaha di e sentencia di dia 7 di juni,- cual RBM Estates tambe kier pa corte declara nulo -, den e caso aki no ta 'dje pisa ey'. Pa por declara esaki nulo, e desventaha mester tin un caracter mas serio y grandi y den e caso aki, corte no ta haya esey e motibo. Pa tur e motibonan ey, corte a declara e peticion di RBM Estates como no admisibel. 

REACCION RBM

Na nomber di su cliente RBM Estates, abogado Jeanot de Cuba a reaciona na NoticiaCla.com di e siguiente forma aki. "RBM ta considerando su posicion, pero en bista di e statementnan publico di minister, ta confia ariba cu lo extende e 'optierecht' formalmente pendiente cambio di ROP, manera anuncia door di minister repetidamente" de Cuba a finalisa bisando.