RBM den corte: Gobierno a priminti y mester cumpli cu tereno di Bubali

ORANJESTAD - E sentencia den caso di dia 7 di juni entre Aruba Birdlife Conservation y gobierno di Aruba tin consecuencia serio pa e plannan di e grupo di desaroyado RBM Estates (compone pa e doñonan Misier y Acosta pa cu un di nan proyectonan,  particularmente, Las Olas). Esey tabata base di e caso cu a tuma lugar diaranson mainta den corte. Gobierno di su banda mientrastanto den un buelta di 180 grado a practicamente laga e compania en cuestion 'cay' (compara cu nan intencion anterior) a mustra cu e grupo mester tin 'pasenshi' y warda ora cu ta asina leu pa nan haya nan 'tereno'. Esaki pasobra nan ta den proceso pa 'ahusta' e asina yama Ruimtelijk Ontwikkelings Plan (ROP) y esey por dura un tempo mas. Y mientrastanto e grupo no por 'asumi' cu nan ta bay haya e tereno awor sin mas, aunke cu 'en berdad' tabatin toezegging haci anteriormente. 

DEFENSA DI RBM ESTATES

RBM Estates a cuminsa e caso aki pa haya un 'chens' pa defende nan mes awor legalmente mirando cu den e caso anterior nan 'no tabata participe' ni como partido ni acusado ni den ningun otro forma  y no a wordo poni mes di e caso. "Como tal e no por a wordo añadi e tempo ey" abogado Geoffrey Wever a declara pa RBM Estates. Y mirando cu e compania a cumpli cu tur condicion pa haya e opcion pa tereno erfpacht durante un trayecto largo, nan mester por haya esaki awor. "Pero si e veredicto di dia 7 di juni keda vigente, gobierno no por pasa pa firma e traspaso di tereno erfpacht, por lo menos no sin haya su mes cu un multa". Loke a resalta tambe den e defensa ta e contacto continuo cu e compania aki tabatin directamente cu e respectivo minister (Sevinger) y e departamento concerni, esta DIP (Departamento di Infrastructura y Planificacion). A mustra corte cu durante combersacionnan cu minister mes, el a duna indicacion di kier cambia e ROP relaciona cu e destinacion di tereno berde pa uno no berde. 

TERENO BERDE OF NO

E discusion di tereno berde of no segun RBM Estates no mester t'ey pasobra segun nan informacion, e area cu nan tin cu haya, no ta un tereno berde sino mas bien ta na e frontera di e parti berde na Bubali Plas. Y basa riba e principio di igualdad, nan mester haya e tereno otorga, sea cual sea e ROP. Ademas, segun Wever, ta den interes di gobierno pa e proyecto keda desaroya ya cu e ta crea trabou, entrada pa gobierno, e ta aporta na economia y mas. Ademas e ta crea un 'spinoff' turistico mas grandi. Pa loke ta e opcionan duna, berdad cu e fechanan pa otorga e opcion di tereno a vence, pero a haya palabracion e aña ainda cu nan lo a wordo prolonga cu por lo menos 6 luna."Cu no a keda cla nos a wordo avisa pa DIP, ta cu pa falta di personal no a traha e cuenta ainda".

ACTITUD SORPRESIVO Y DIFERENTE DI GOBIERNO

Gobierno di su banda a sorprende tur hende den corte ora pa medio di abogado Sjiem Fat, a mustra un postura di 180 grado compara cu e caso anterior, indicando (pa cuminsa) cu e reclamo di tereno di RBM no ta valido. A mustra ademas cu contrario na informacion anterior, e ROP ta compromete gobierno. "Gobierno no por simplemente sconde su tras" e abogado a bisa. "RBM no por basa su mes riba 'intencion' solamente. Berdad a duna nan opcion (pa tereno) y a haci promesa, pero esey tabata prome cu a inicia e proceso di cambio di ROP cu ta algo cu a tarda mas cu a spera".  Actualmente e tereno ta forma parti di area 'berde' y como tal e dunamento di opcion riba e tereno ey ta bira invalido. Ademas e hecho cu a crea un confiansa no ta base pa honra e peticion. "E no ta un proteccion". Pero, den mesun rosea, abogado di gobierno a mustra cu mester tin pasenshi, pa wak si en berdad por duna e tereno aki. Y ora cu ta asina leu, e partidonan respectivo lo por haya nan opcion. Pero ainda no. "Gobierno no a bisa cu e no ta bin. Pero no por anticipa of prehusga un situacion asina. Gobierno a faya y awor lo bay coregi e fayo aki" Sjiem Fat a sigui bisa. E intencion ta pa gobierno redestina e areanan cu supuestamente ta berde y cambia esaki mirando cu economicamente e tin mas prioridad pa desaroyo y ademas cierto areanan toch lo haya suficiente proteccion. Pero awor esey no t'ey ainda. 

DEFENSA DI ABC

Abogado di ABC a keda altamente sorprendi pa e actitud diferente di gobierno su abogado. "Nos a spera un bataya fuerte" Geert Rep como abogado di ABC a bisa NoticiaCla.com  Pero pa sorpresa, y esey uno placentero, a nota un cambio drastico di gobierno unda cu a admiti nan fayo y a mustra cu nan no tin intencion di kibra e acuerdo di ROP manera cu e ta awor, y ta te despues lo bay atende e asunto aki. Pa aworaki e tereno ta berde y ora cu bin cu e cambio, nos lo bringa esaki atrobe" Rep a bisa NoticiaCla.com. Den corte Rep a para ariba cu aunke ta mira e bon intencion di gobierno awor, ta para ariba cu no por duna e tereno na e compania en cuestion, no na opcion, no na otorgamento di tereno erfpacht.