Aruba contento cu trabou di taskforce contra traficacion di hende

ORANJESTAD - Aruba ta contento cu trabou di Taskforce contra traficacion di hende. Asina  hefe di e task force responsabel pa e parti aki Jeannette Richardson Baars a reacciona bisando riba e rapport cu NoticiaCla.com a produci siman pasa riba traficacion di hende, unda cu a mustra cu Aruba no ta cumpliendo completamente cu esaki. Richardson ta bisa cu a tuma nota di e “TIP report 2016” emiti door di “US State Department” y a aclaria e informacion publica. 

CUMPLIMENTO DI ARUBA

Segun Richardson, na prome luga Aruba ta yama Sint Maarten pabien cu e evaluacion den “TIER 1”, cu ta e evaluacion mas halto posibel den e sistema di TIP. TIER 1 kiermen cu un pais ta cumpli cu tur e rekisitonan di TIP. Aruba a keda den TIER 2 cu tambe ta un bon evaluacion. TIER 2 kiermen cu e pais no ta cumpli cu tur e rekisitonan, pero si ta haci suficiente pa combati traficacion di hende.

PRIORIDAD

Segun Richardson, den su opinion e prioridad mester wordo poni riba prevencion di Traficacion di Hende, pasobra si un hende no ta bira victima no tin necesidad pa raporta, investiga y castiga. Cifranan di cuanto caso a bay Corte of cuanto victimanan a wordo yuda no mester ta decisivo den e evaluacion di TIP, pero mas bien tur e esfuersonan cu un pais ta haci pa preveni y combati traficacion di hende. 

TASKFORCE

Aruba tin pa casi 10 aña caba un Taskfoce contra Contrabanda y Traficacion di Hende cu ta consisti di representantenan di tur e gremionan cu tin di haber cu e tema.  E taskforce ta traha riba un nivel multi disciplinario na Aruba y a zorg pa lanta conscientisacion tocante Traficacion di Hende cu campañanan informativo. Tambe a inicia un liña di telefon special (5923231) cu por wordo yama pa yudansa 24 ora pa dia, 7 dia pa siman.

Na aña 2013 Aruba tabatin e prome investigacion di Traficacion di Hende den Caribe Hulandes y a traha hunto cu paisnan den region y internacional pa identifica y proteha victimanan. Den e caso aki e sospechosonan a wordo castiga. Den Corte di apelacion a confirma e conviccion y a dicta un castigo mas halto ainda. Esey lo wordo raporta den e “TIP report 2017”, dor cu esey a sosode den cuminsamento di aña 2016.

NINGUN CASO PERSIGUI NA 2015

Richardson ta admiti manera cu NoticiaCla.com a raporta, cu en berdad na Aruba ningun caso a wordo persigui of hiba dilanti di Hues den 2015.  Si a investiga 6 posibel casonan y a brinda proteccion na e posibel victimanan. Hopi energia a wordo hinca pa profesionalisa e trabou di Taskforce door di traha un ‘Plan van Aanpak’ pa 4 aña te 2019 y menciona e puntonan di accion cu mester wordo cumpli cu ne. E “TIP report” di 2015 a duna Aruba 7 recomendacion y tur esakinan a wordo poni den e “Plan van Aanpak”. Hopi di nan a wordo ehecuta caba of ta den procesa di wordo ehecuta.

CONCIENTISA

Tambe taskforce a conscientisa tur e trahadonan di e departamentonan cu tin di haber cu e tema di Traficacion y Contrabanda di hende. For di april te cu awe ya un total di 230 personanan a sigui e training. Ta trata di empleadonan di Cuerpo Policial, Inmigracion, Duana, Kustwacht, Directie Arbeid en Onderzoek, DIMAS, Dienst Sociale Zaken y RST. Despues di vakantie e trainingnan nan lo sigui. Tambe a pone hopi enfasis riba “awareness training” pa studiantenan y hobennan den nos comunidad. 

CAMBIO GRANDI

Un cambio grandi a tuma luga dor di formacion di ‘Coordinatiepunt Mensenhandel y Mensensmokkel’ bou di e Coordinador Nacional den cuminsamento di 2016. Un di e tareanan ta registra y analisa tur señalnan di posibel Traficacion of Contrabanda di Hende pa asina casonan por wordo descubri mas tempran. E Coordinatiepunt por ripara cu e prome mita di aña 2016 ya tin 9 caso registra y 2 caso ta bou investigacion di Cuerpo Policial.

CONTENTO CU E TRABOU DI TASKFORCE

Aruba por ta contento cu e trabou cu Taskforce y Coordinatiepunt a haci bou guia di Coordinador Nacional contra Contrabanda y Traficacion di Hende pa Aruba. Tur envolvi ta sigui combati Contrabanda y Traficacion di Hende cu mesun energia y perseverancia awo y den futuro.