Aruba no ta cumpliendo full pa elimina traficacion di hende

ORANJESTAD - Gobierno di Aruba no ta cumpli completamente cu e standard pa eliminacion di traficacion di hende. No obstante esey e ta haciendo esfuerso significativo pa drecha esaki. Asina e "Trafficking in persons report june 2016" ta bisa. Como tal Aruba ta cay den e categoria "Tier 2" cu ta nifica 'incumplimento pero avance pa drecha e situacion'. Corsou tambe ta forma parti di e grupo aki. St Maarten sinembargo si ta cumpli cabalmente y ta cay den categoria "Tier 1". Un di e motibonan di Aruba su categoria, ta e falta di persigui suficiente casonan di traficacion di hende pa e di dos aña sigui. 

FUENTE PA TRAFICACION

Manera tur pais, e rapport ta dedica henter un seccion na Aruba indicando e puntonan di recomendacion, incumplimento y e situacion actual di nos isla. Entre nan, e ta menciona Aruba como un fuente y destinacion pa tanto homber, muher y mucha pa traficacion y ta reparti esaki den varios forma. Muhernan Venezolano ta wordo uza pa traficacion cu e fin di traha como prostituta. Hombernan ta wordo trafica pa wordo uza den construccion. Hombernan Chines y muher ta wordo trafica pa wordo uza den supermercadonan Chines, esnan Hindu pa traha den tienda y muhernan di Caribe y otro paisnan Latino ta wordo uza pa trabou domestico. 

PERSECUCION

E rapport ta mustra fayo di Aruba pa persigui mas caso di traficacion di hende. "(E) gobierno no a inicia persecucion nobo pa casonan di traficacion pa e di dos aña consecutivo, pero a haci intento si pa wanta un sentencia di un traficante di hende den corte di apelacion. Positivo pa Aruba tambe den e rapport ta e mencion cu na 2014, gobierno a adapta e leynan cu sentencia mas severo pa cargonan di traficacion. Di otro banda, ta menciona cu e coordinador nacional pa asuntonan di traficacion di hende a ricibi varios notificacion di casonan potencial di traficacion cu fin nan sexual y labor obligatorio. "Pero el a haya cu solamente un caso (di labor obligatorio) tabata necesario pa mas investigacion", e rapport a sigui bisa. Ademas e rapport ta menciona cu Aruba no a persigui of sentencia ningun traficante na 2015, y tampoco 2014. Na 2013 tabatin dos caso cu a wordo trata cu sentencia. Uno a wordo apela y ainda hues tin cu dicidi riba e caso ey. 

PROTECCION

E rapport ta papia positivo di e intento di gobierno pa proteha e victimanan di traficacion. "Gobierno a sostene progreso den proteccion di victima" e rapport ta bisa. E ta referi e.o. nan e proceso di referencia di victima con pa procedi ora cu tin un caso asina. Tambe ta haci mencion di un hotline cu a keda estableci riba e tereno ey. Loke ta un problema segun e rapport, ta fondonan aloca riba e tereno aki. "E falta un presupuesto dedica pa shelter y otro forma di asistencia pa victima, pero formalmente a pidi pa fondo si". 

PREVENCION

Riba e tereno di prevencion gobierno ta haya mas elogio. Aki ta papia e.o. di un plan di action pa 2015-2019 aunke cu e plan mester haya aprobacion ainda di e minister di husticia. Tambe ta haci mencion di e campaña di concientisacion den 4 idioma, un carchi di informacion pa imigrantenan pa reconoce señal di labor obligatorio forsa, y kico pa haci ora cu esaki sosode. Tambe a adapta metodonan nobo pa screen 'animadornan adulto'. Ademas gobierno a lansa un proyecto di investigacion riba e industria comercial di sexo, serca Pan American Health Organisation. Pues, gobierno tin hopi caminda pa drecha ainda, pero ta haciendo e intento si.