Koenders: No ta mira necesidad pa visa pa Venezolanonan

DEN HAAG - No ta mira e necesidad aworaki pa introduci un visa temporal pa Venezolanonan bishita e islanan Caribense den Reino Hulandes (incluyendo Aruba). De hecho Aruba (ni otro islanan di Reino) no a haci ningun peticion pa introduci visa pa Venezolano. Asina minister di relacionan exterior Bert Koenders a contesta parlamentarionan Hulandes Bosman y ten Broeke pa medio di un carta. E preguntanan tabata a base di un articulo di NoticiaCla.com riba e tema. 

SITUACION TA SIGUI PREOCUPANTE

Segun Koenders, e situacion na Venezuela ta sigui preocupante, pero esey no a cambia. Ademas tin contacto constante entre su ministerio y e islanan riba e tema. Y basa riba tur e corespondencia, e minister no ta mira necesario pa implementacion di un visa temporal. Ademas no tin un aumento di Venezolanonan cu ta biaha pa Aruba. De hecho compara cu 2015, e cantidad a te hasta mengua.  

DESEO PA VISA PA VENEZOLANO

E mandatario ta sigui mustra cu durante e ultimo conferencia riba visa na april di e aña aki, riba peticion di Aruba a bin e topico di situacion di Venezuela. "Pero e deseo pa introduci un visa temporal pa Venezolano no a bin na remarke. Si a papia riba e consecuencia cu e situacion na Venezuela tin riba e islanan. Riba nivel gubernamental tabatin contacto recientemente pa papia riba e deseo pa implementa un visa, y e gobierno di Aruba ta riba alerta pa cu e desaroyo na Venezuela relaciona cu un influx di Venezolano y ta tene e opcion pa introduci e visa, habri. "Pero no tin un peticion oficial pa e visa temporal."

REUNION CU EMAN 

E mandatario Hulandes a mustra cu fin di 2015 el a papia cu prome minister Mike Eman riba e tema. "Eynan e asunto di visa a bin na ordo, y cu e lo bira un obstaculo pa e Venezolano cu si ta beneficia e parti Caribe di Reino Hulandes. Ademas no por a papia di un garantia cu e visa lo impedi e 'mal Venezolano' di bishita Aruba. A papia di miho fortifica e regla di admision pa e islanan. A base di e debate riba e visa, e mandatario ta evaluando pa bin cu un tipo di visa di yegada, estilo ESTA di Merca. E mandatario Hulandes ta referi na e relato di NoticiaCla.com tambe riba e medidanan extra cu a tuma manera un miho screening di pasahero na aeropuerto. "E tipo di posibilidadnan mi ta kere ta mas rasonabel y realisabel en bes di un visa pa un grupo di Venezolano".