Kier caba settlement cu Valero pa diahuebs awor

ORANJESTAD - Gobierno ta tratando na keda cla cu e 'settlement' pa e obligacion di desmantela di refineria Valero. Asina e hefe di e team di negoshado pa Aruba Richard Arends a confirma na NoticiaCla.com diaranson. Esaki despues cu a bira conoci siman pasa cu prome cu gobierno por bay parlamento cu e deal di CITGO, e parti di negociacion cu Valero mester keda cla. Segun Arends, e intencion ta pa esaki keda cla mas tarda diahuebs awor, pa otro siman por manda e informacion pa parlamento y asina trata esaki den un reunion publico. Segun Arends, ta trahando duro cu Valero riba esaki y ta basa riba e acuerdo di 1989 riba desmantelacion, cu ta vigente ainda. Cu esaki, gobierno a dicidi pa no warda e resultado di investigacion riba e daño na medio ambiente pa e refineria. Den un declaracion mas amplio na Caribisch Netwerk, Arends ta mustra mas detayes di e deal di e settlement.