Ora caba negosha cu Valero, Parlamento ta haya e CITGO deal

ORANJESTAD - Ora cu gobierno caba negosha cu Valero, nan lo ta cla pa bin Parlamento y presenta e pakete completo di e deal cu CITGO. Asina minister di energia Mike de Meza a contesta presidente di Parlamento Marisol Lopez Tromp diaranson ultimo pa medio di un carta cu NoticiaCla.com tin den su poder. No a duna fecha ainda cuanto nan lo dura pa esey keda cla. Den e carta ta papia di 'termino hopi corto' pero no a duna fecha exacto. E parti cu segun de Meza, falta pa keda cla ta e e asina yama 'schikkingsovereenkomst'. Como tal de Meza kier presenta e pakete 'completo'. Pa evita posibel problema di confidencialidad, lo sinembargo pone e documentonan solamente disponibel pa 'wak' algun dia na Parlamento, den forma di 'inzage'. 

REACCION DI LOPEZ

Lopez riba su pagina di facebook diabierna a splica e situacion actual na Parlamento. "Siman pasa mi a pidi Gobierno pa entrega e acuerdo(nan) cu nan a anuncia y a sera y firma pa loke ta reapertura di refineria, pa asina Parlamentarionan por prepara nan mes debidamente pa un reunion publico informativo cu 3 minister" Lopez ta cuminsa skirbi. "Pasobra cu Gobierno di Aruba no tin nada firma ainda cu Valero y ta bisa cu ainda nan ta den negociacion, Gobierno ta contesta Parlamento cu e ta prefera warda cu dunamento di e pakete total di informacion 'ter inzage' pa algun dia na Staten, te despues cu Gobierno cera un acuerdo cu Valero" Lopez ta finalisa bisando. 

NO POR COPIA DOCUMENTONAN

Loke ta hala atencion ta cu no kier parti e documentonan rond manera ta haci normalmente, pa evita cu e documentonan por wordo fisicamente copia y reproduci pa medio di foto, pa despues wordo reparti. "Esey lo viola e acuerdonan di confidencialidad entre gobierno, CITGO y Valero y lo por afecta e interes di e companianan aki seriamente" de Meza ta sigui bisa. Como tal lo presenta nan 'ter inzage' pa algun dia na Parlamento.