Hulanda ta haya sa awe si ta haya asiento den Nacionan Uni

NEW YORK - E asamblea general di Nacionan Uni awe mainta ta scohe e 5 paisnan cu lo haya un asiento no permanente di e conseho di seguridad. Hulanda ta un di e tres paisnan cu ta participa pa e grupo di Europa occidental, hunto cu Suecia y Italia. Aruba su participacion aki tabata crucial y a lobby formal pa mas di un aña pa convence miembronan Caribense e.o. pa vota pa Hulanda. De hecho, e lobbymento ta wordo menciona como un di e motibonan pa e forma con Hulanda a bin ta trata Aruba ultimo aña(nan), esta un forma mas 'tolerante'. 

ARUBA TA LOBBY PA HULANDA 

Pa mas di un aña tabatin e pregunta con bin Hulanda ta tratando Aruba diferente cu otro islanan den Reino Hulandes, no obstante su comportacion financiero (y otro asuntonan manera asunto di permiso) no tabata 'manera mester ta'. E motibo duna 'inoficialmente' tabata cu Hulanda tabatin mester di Aruba pa lobby p'e mirando e posicion strategico y positivo cu prome minister di Aruba Mike Eman tin cu e islanan den region. Oficialmente, den un entrevista anterior cu minister Hulandes Ronald Plasterk, esaki a desmenti esey na NoticiaCla.com, bisando cu esey no ta berdad y cu tur pais ta yudando Hulanda cu esaki y no solamente Aruba. Pero cu esey ta e motibo cu Aruba ta wordo trata cu handschoen di felpa, ta absurdo. Mes momento e pensamento ta cu si unabes cu Hulanda haya e posicion, of en todo caso despues di awe, Hulanda su posicion pa cu Aruba lo por cambia. Algo cu segun Hulanda a wordo cataloga tambe como absurdo. 

TRATO PREFERENCIAL

Sinembargo den 'wandelgangen' diplomatico, NoticiaCla.com a compronde cu cosnan ta otro y cu debidamente e 'lobbymento' pa e posicion aki tabata (un) motibo pa e trato 'preferencial'. E constante biahenan di nosu prome minister den exterior tabata (entre otro) pa e motibo aki. Oficialmente a duna como motibo cu e bishitanan di Eman, tabata pasobra e tabata pone su mes disponibel, y e otro (prome ministernan) tabata ocupa. 

ELECCION MAINTA 

E eleccion lo tuma lugar diamars den oranan di mainta, unda cu banda di Hulanda y e otro paisnan pa Europa Occidental, tin participacion di Kenya, Ethiopiay Seychelles pa e grupo Africano, Kazakhstan y Thailand pa e grupo Asiatico Pacifico, y Bolivia pa e parti Latino Americano y Caribe. Unabes eligi, e paisnan lo permanece den e funcion pa 2 aña cuminsando 1 di januari 2017. E beneficionan pa e paisnan ta multipel, y unda cu nan por ta crucial pa tuma cierto desicionan crucial.