Plasterk ta admiti trato diferente pa cu Aruba y pakico

ORANJESTAD – Aruba ta wordo trata diferente berdad compara cu e otro islanan, pero esey ta pasobra su situacion ta diferente. Minister Hulandes pa asuntonan di reino Ronald Plasterk a atende e pregunta di NoticiaCla.com awe mainta, riba e percepcion cu Aruba ta wordo trata diferente cu otro islanan. De hecho, e impresion segun e mandatario cu Aruba ta wordo trata cu un handschoen di felpa, no ta corecto. Pero si ta berdad cu Aruba tin un otro trato, pero e tin su motibo. Y e no ta pasobra Hulanda ta lobby pa un asiento den e conseho di seguridad nacional otro aña, pasobra esey ta algo colectivo di tur isla, incluyendo Aruba. “Pero esey no ta e motibo di e diferente trato”.

CON DIFERENTE E SITUACION TA

E mandatario a bay bek riba e comentarionan di pasado cu ta conoci y a bira practicamente un disco raya, esta cu e areglo entre Hulanda y St Maarten y Corsou ta diferente cu esun entre Aruba y Hulanda. Entre nan e rijkswet financieel toezicht, e kwijtschelding di e dos islanan, vs Aruba cu no a haya tal trato. “E situacion ta diferente” e mandatario a ripiti . A puntra e mandatario pakico e ora ta sera acuerdo cu otro, siendo cu no ta cumpli cu nan. Ni Aruba, ni Hulanda. Entre otro a referi na e protocol, cu a stipula cu si Aruba no cumpli cu cierto deadline, cu lo tin consecuencia. Entre nan tin e fecha di 1 di augustus recien, riba cual e ley Laft mester tabata cla y den funcion. E fecha a pasa y bay y e no tabatin consecuencia pa Aruba. Esey ta algun punto di percepcion cu ta duna hende di pensa cu Aruba ta wordo diferente trata y cu Hulanda tin sea miedo pa mishi cu Aruba of ta dun'e trato preferencial.

BO MESTER TENE BO MES NA PALABRACION HACI

Aki Plasterk a duna NoticiaCla.com rason, den e sentido cu si pone regla, bo mester tene bo mes na dje. “Bo tin rason. Bo ta palabra cu otro, y bo mester tene bo mes na dje” Plasterk a bisa. Algo cu Aruba segun Plasterk, no a haci pa hopi tempo. Di otro banda e ta sinti cu berdad no ta e situacion ideal di cual e mester ta, pero laga asina numa. “E punto ta helder. Nos mester traha na un situacion unda cu tur hende ta tene su mes na e palabracion, segun e termino stipula”. Riba esaki, NoticiaCla.com a remarca cu esey por bien ta, pero ta netamente loke cu Hulanda no a haci. Y aki a referi na un situacion pendiente awor, esta e cumplimento na tempo di e presupuesto, cu ta 15 di december. “Si, pero esey no ta na ami pa haci, pero na esnan encarga pa cumpli cu ne. Y e peticion ey mi a haci tambe” Plasterk a bisa, refiriendo na e hecho cu el a atende e asunto ey cu e gobernantenan local.