Tjin- Asjoe: Siman a habri cu 'business as usual' pa ATA

ORANJESTAD - Siman a habri normal pa Aruba Tourism Authority pa loke ta nan operacion regular. "Ta business as usual" CEO di ATA Ronella Tjin Asjoe a bisa NoticiaCla.com dialuna atardi. Mientrastanto e portal aki a haya confirma cu na nivel di gobierno, AHATA a haya un carta pidiendo pa e lista di 6 nomber di candidato  di AHATA pa reemplaza e tresnan cu a retira siman pasa den un forma abrupto. Abogadonan di AHATA a contesta e carta, informando cu 'dentro di poco lo AHATA 'get back to them'. Pues e bala ta den tereno di AHATA pa wak con esaki ta sigui. 

BUSINESS AS USUAL

Mientrastanto manera cu tanto e CEO di ATA a bisa, y e presidente di e hunta di supervision di ATA , Jossy Lacle, a confirma diabierna ultimo, trabou ta 'business as usual', aunke no ta sano pa e situacion aki perdura mucho largo den e constelacion cu e ta aworaki. Despues di basta persistencia, Tjin Asjoe y Lacle a admiti na NoticiaCla.com cu e constelacion cu tin aworaki ta ok pa aproba sumanan substancial pa ATA por sigui draai cu su operacion. Con largo, ningun di dos por y kier a bisa pasobra nan ta nenga di pensa cu esaki lo perdura mucho tempo mas. "Mi ta nenga di pensa cu esaki ta algo delibera" minister di turismo Otmar Oduber a bisa diabierna ultimo. Ela confirma for di Panama den fin di siman, cu ela manda e carta pa AHATA pa pidi e nombernan di e candidatonan nobo. El a confirma tambe cu el a ricibi un contesta cortico bek di e abogadonan. AHATA mes no ta dunando ningun comentario publico, basa riba regla di confidencialidad.