Aruparking: Ta Camara di Comercio no a follow up!

ORANJESTAD - Ta Camara di Comercio ta esun cu no a follow up cu reunion manera cu nan a indica ultimo biaha. Asina Aruparking a reacciona e siman aki riba e critica di Camara di Comercio contra di e compania di parkeermeter. Segun Aruparking ta for di inicio cu a cuminsa cu e compania, nan a mustra e disposicion pa traha hunto cu comercio ofreciendo e clientenan un mihor producto y un experiencia agradabel pa shop den Caya. "Lamentablemente a bisa cu lo bay reuni y lo ‘get back’ na nos, pero esey nunca a sosode" e compania ta laga sa pa medio di un comunicado.

A ACERCA COMERCIO PA PROMOVE SHOPPING Segun Aruparking nan a 'enfatisa cu a acerca comercio den centro di ciudad pa participa cu nos den un campaña pa promove shopping den centro di ciudad'. " Nos portanan semper ta habri pa mira no solamente e cooperacion pa un campaña cu lo inicia 1 di juli, pero pa un cooperacion continuo unda tur hende lo sali beneficia" e compania ta sigui bisa. 

DATOS DI ENCUESTA PRESENTA

Segun e compania, durante nan conferencia di prensa recien, unda a presenta datonan di un encuesta realisa pa un compania independiente, a mustra cu e aceptacion di esnan cu ta bin den centro di ciudad pa loke ta parkeermetes ta den su mayoria positivo, pero naturalmente cu espacio pa mehora y esey nos ta trahando constantemente riba dje pa mehora nos servicio na cliente. " Pa loke ta e transaccionnan, durante e mesun conferencia aki nos a mustra cu esakinan ta aproximadamente 60 mil pa luna, cual ta un indicativo hopi positivo cu e parkeermeters ta wordo uza. Tambe a mustra cu e ocupacion mayoritariamente ta na e mitad abou di Caya Betico Croes, mientras cu e parti pariba su ocupacion ta minimo y nos tambe ta di opinion cu algo mester wordo haci, pero e mester wordo haci conhuntamente cu e diferente partnernan" e compania a sigui bisa.

HABRI PA YEGA NA ACUERDO CU COMERCIANTENAN

Aruparking a, ta y lo sigui ta habri pa yega na acuerdonan cu comerciantenan y cu cualkier otro partner cu lo kier contribui pa mehora e experiencia y calidad di shopping den nos centro di ciudad y nos ta spera cu e reunion cu Camara di Comercio cu ta pendiente pa basta siman lo por tuma lugar y sali cu un posicion fuerte cunhunto pa bienestar di comercio di nos centro di ciudad.