KVK: Situacion di Caya Grandi a empeora

ORANJESTAD – Situacion di Caya Grandi a empeora. Asina presidente di Camara di Comercio (KvK) Daphne Lejuez a splica durante un conferencia di prensa. Segun Lejuez, algun tempo pasa Camara di Comercio y Industria Aruba (KvK)  a dedica atencion special na e situacion dificil di comercio den centro di cuidad. Atraves di un encuesta entre empresario a duna un analisis di e situacion, cu tabata negativo pa un parti substancial di e comerciantenan den e area.

REUNION CU COMERCIANTE 

Recientemente KvK a bolbe reuni cu comerciantenan di centro di cuidad y a haya cierto informacion adicional di e comerciantenan, cu ta ilustra mas aleu con e situacion ta. Ta trata aki di informacion confidencial di algun compania, cu ta opera ainda, pero ta indica (cu documentacion) cu nan benta ta na un nivel deplorabel, specialmente despues di e instalacion di parkeermeter. Nos ta agradecido pa e confiansa cu e empresanan aki a demostra compartiendo nan informacion interno cu KvK.

CAIDA DI BENTA

Mientras cu e cifranan ta varia entre empresa, tur ta indica un caida di benta drastico despues di introduccion di parkeermeters y nan analysis comparativo cu e aña anterior (2015/2016) ta mustra un caida di benta, cu den algun caso ta asina severo cu por papia di 50-75% di caida di benta. Segun Lejuez te hasta companianan nobo cu a drenta centro di cuidad recientemente a raporta cu apenas despues di tres luna den operacion nan benta diario lo a cai di casi 1,000 pa 100 florin pa dia.

BENTA ABOU CU PARKEO LIBER 

"Yamativo tabata cu na december 2015, a pesar di e dianan cu tabatin parkeo liber, varios negoshi a raporta benta tabata mas abao cu varios otro luna den e mesun aña, loke normalmente no ta e caso pa motibo di e dianan di fiesta."

VARIOS EMPRESA A CERA PORTA CABA 

Cu e informacion aki, KvK ta ilustra algun ehemplo di empresa cu ta opera ainda, mirando cu varios ya caba a cera nan porta y algun ta seriamente considerando esaki si no bin cambio, pero ta observa cu e introduccion di e parkeermeternan a afecta nan negoshi considerablemente. Mirando e cantidad di empresa cu a cera nan porta caba, y e situacion di esnan cu ta habri ainda, no a cambia nada den e situacion di emergencia cu KvK a señala anteriormente caba. Ta na su luga haci un yamado na e autoridadnan gubernamental pa reconsidera e maneho di parkeo den centro di ciudad y e orario di funcionamento di e tram (pa trafico por pasa) pa asina crea un "level playing field" pa companianan den centro di cuidad por competi riba un nivel comparativo cu tur otro negoshi pafor di centro di cuidad cu actualmente no conoce e obstaculonan aki.