Oduber: Miembronan di AHATA cu a retira di ATA no a duna motibo

ORANJESTAD - No tin ningun motibo duna den e carta di retiro di e miembronan di AHATA for di e directiva di ATA. Asina minister di turismo Otmar Oduber a bisa NoticiaCla.com diahuebs como reaccion di e primicia di e portal aki riba e retiro abrupto 'en bloc' di e miembronan di AHATA for di ATA. "Mi no sa kico ta e rason cu nan a pidi nan retiro" Oduber a bisa. E ta haya e comentarionan si duna hopi straño, pasobra recientemente ainda AHATA a elogia e maneho di ATA durante algun evento turistico na Aruba. 

ELOGIO PA ATA

E mandatario ta referi na e.o. discursonan di e CEO di AHATA Jim Hepple a gaba e relacion cu tin cu e ministerio y cu ATA pa loke ta e plan di mercadeo y maneho di ATA. Ta e mesun speech cu Hepple a duna durante e evento di AME, ATCA y CATA. "Mi ta haya hopi straño cu despeus di tres evento asina grandi cu nos partnernan a gaba e relacion cu ATA y ministerio y awor diripiente esey a bira un problema" Oduber a sigui bisa. Ademas e mandatario ta mustra cu cada plan di mercadeo, business plan di ATA ta wordo aproba door di e directiva caminda cu tur tres miembro (di AHATA) unanimamente semper a aproba e marketing plan, e presupuesto, como tambe e business plan di ATA. "Ami apenas despues cu nan aprobele, ta hay'e pa firma" Oduber a bisa. Pues segun e mandatario, si tin un mal maneho eyden, nan tin cu wak nan mes den spiel.