Eman: E pakico no a bay parlamento ainda cu e CITGO deal

ORANJESTAD - Minister presidente Mike Eman no tabatin un contesta mesora pakico su gobierno no a presenta e contenido di e CITGO deal na parlamento ainda, pero si otro caminda. Fuera di bisa cu colega de Meza den pasado a bishita Parlamento cu e comision di reapertura, el a confirma cu esey no a sosode si despues cu a firma cu CITGO na Caracas. Ora cu NoticiaCla.com a puntra e mandatario specifico pakico a scohe pa bay duna presentacion tur caminda prome cu bay parlamento, e mandatario no por a duna un motibo. "Mi no sa" Eman a bisa simplemente. E tardansa pa bishita parlamento a causa cu parlamento a manda un carta den weekend, halando atencion di gobierno riba esaki. 

CANA CAMINDA SIMULTANEAMENTE

Despues den su defensa, e mandatario a bisa "Ora cu nos a bin bek, a sinti cu parlamento y comunidad mester haya informacion simultaneamente y p'esey a cana e caminda aki" refiriendo na e forma cu a bay splica pafo prome, cu bin parlamento pa un bijeenkomst. E mandatario a splica si cu tin dos proceso ta canando pareu. "Tin un proceso cu ta encera henter e ley cu locual mester bay parlamento, cu ta inclui e contractnan etc. E proceso ey ta canando" Eman a sigura. El a mustra cu e ta spera cu dentro di corto e documentacion cu tur esaki ta bay Raad van Advies (RvA). Di RvA e ta bay parlamento. "Delanta na esey, minister (Mike) de Meza tin un intencion pa e siman aki of riba e fecha cu ta cumbini parlamento, pa bay duna un presentacion completo hunto cu henter e ekipo pa parlamento por ta na altura tambe di e ultimo detayes" Eman a sigura e portal aki. Scucha e entrevista cu NoticiaCla.com a tene cu prome minister aki.