Lopez: Parlamento mes no a ricibi nada di CITGO deal ainda

ORANJESTAD - E hecho cu tur caminda gobierno ta haciendo presentacion riba e deal cu CITGO Aruba a cera cu gobierno di Aruba no a cay den bon tera cerca parlamento. Manera cu NoticiaCla.com a delanta ayera caba den su edicion, parlamento a exigi un reunion riba e topico aki. Awe presidente di parlamento Marisol Lopez ta duna mas splicacion. "Ta sali yen publicacion den prensa, pero Staten mes no a ricibi e acuerdo(nan) y documentonan relevante pa lesa ainda." Lopez Tromp a bisa. Algo cu no ta corecto. Y e ta confirma diasabra cu a manda un carta diabierna pa gobierno pa atende cu esaki. 

CARTA MANDA PA GOBIERNO

"Ayera nos a mand'e carta pa gobierno. Pasobra fractie di MEP y Donny Rasmijn como voorzitter di vaste commissie a pidi esaki" Lopez a confirma. "Parlamento mester wordo informa. Y cu documento manda delanta" Lopez a sigui bisa. Mientras cu ela confirma cu e reunion ta tuma lugar otro siman, un fecha exacto e no por a duna ainda. "Mi por pone fecha ora gobierno manda documento". Y e ta spera cu comienso di otro siman esey ta e caso. 

CRITICA DEN COMUNIDAD

Manera ta conoci gobierno a dicidi di haci varios presentacion rond di Aruba e siman cu a pasa, pa splica comunidad di e deal cu a wordo cera recientemente na Caracas. A haci dos presentacion pa comunidad, y uno na e sede di partido mes. Pero parlamentarionan mes no a wordo informa, cu ta algo cu nan no ta contento cu ne. Nan ta consider'e un falta di respet mirando cu prome cu firma cualkier cos, e mester bay parlamento prome. Awor cu a firma esaki, enbes di bin Parlamento prome, ta bay tur caminda mientras cu Parlamento mes ainda no a haya nada.