BCA: No tin motibo pa intrankilidad den caso di Ennia Aruba

ORANJESTAD - No tin motibo pa intrankilidad. Asina Banco Central di Aruba (BCA) a sigura comunidad di Aruba e fin di siman aki pa medio di un comunicado referente e situacion na Ennia. "BCA ta enfatisa cu e ta aplica y lo aplica instrumentonan legal y tur otro autorisacion legal na su disposicion, si tin un situacion cu ta exigi esey semper cu e meta principal pa proteha interesnan di depositornan y aseguradonan. BCA ta referi na e noticia cu a keda publica diabierna indicando e posibilidad cu ENNIA lo por haya su mes cu problema di fondo pa cubri esnan cu tin pensioen cu e compania. 

NOTICIA DEN MEDIA

Segun BCA, nan a tuma nota di e noticia den medionan local di comunicacion relaciona cu Ennia Aruba cu ta cay bou di supervision di BCA. "Ennia Aruba, cu ta forma parti di e grupo Ennia, ta un entidad Arubano cu tin su propio capital y su propio inversion". Y manera por a spera, e informacion cu BCA ta y lo duna ta limita. 

NO POR DUNA INFORMACION 

"BCA a base di ley no ta permiti pa duna informacion cu e ta haya a base di su tarea di supervision, sigur no informacion riba institucionan individual" e ta cuminsa na bisa. "Pero BCA ta haya importante pa informa e publico cu e ta vigila den un forma estricto cumplimento continuo di e institucionan bou di su supervision". Aki e ta mustra cu e tin varios instrumento legal na su disposicion 'cu e por aplica na momento cu e ta constata cu un institucion bou di su supervision no ta cumpli'.  FOTO CORTESIA www.sluisveld.nl