Financieel Dagblad: Compania di seguro financieramente seco door di propio doño

WILLEMSTAD /ORANJESTAD - Ennia, considera e compania di seguro mas grandi di Antias, lo a wordo financieramente laga seco practicamente pa su propio doño, e comerciante irani-mericano Hushang Ansary. Asina varios corant Hulandes, entre otro financieel Dagblad -, ta raporta awe mainta. E informacion a sali for di un raport secreto di Banco Central di Hulanda (DNB) cu Het Financieel Dagblad a haya den su poder. E documento ingles ta data di juni 2015. 

USA RESERVA PA METANAN PROPIO

Aki ta resulta cu Ennia e ultimo añanan a usa sigur tres cuart di su reserva na dos acuerdo dudoso cu e doño Ansary segun e corant Hulandes ta raporta. Por lo menos 570 miyon euro lo a wordo saca for di Ennia pa inverti den otro negoshinan di Ansary. Ta trata di un tipo di negoshi vestzak-broekzak, esta saca di un caminda y hinca den otro caminda den e mesun compania, osea e doño no ta perde nada. Asina e ganashi ta keda den e companianan di e doño mes.

POLISA DI SEGURO NA PELIGER

Loke ta mas peligroso, ta cu for di e rapport di DNB por lo menos 10 mil persona cu tin polisa di seguro, no tin garantia cu nan seguro tin fondo y cu nan no a wordo poni na altura. Loke ta mas pio ainda ta cu, -segun e rapport-, tur esaki lo a sosode bou di supervision di Banco Central di Hulanda y di Corsou y St Maarten. Asina Financieel Dagblad ta skirbi. Fuentenan ta menciona cu e directiva di DNB lo a wordo alerta caba di e practica aki. Ta apenas 4 aña despues e banco a dicidi di inicia un investigacion, pasobra no tin un autoridad 'formal' pa haci tal. Banco Central di Hulanda awor ta cuestiona integridad di colega banco esta CBCS (Banco Central di Corsou y St Maarten). Segun FD aparentemente tin asina un desastre na CBCS cu DNB a pidi extra autoridad y a haya esaki tambe pa actua contra CBCS.

REACCION FINANCIERO

Reaccion mesora cu NoticiaCla.com a ricibi for di e mundo financiero ta cu ta bisa cu ta remarkable si ku FD no ta menciona ku bou di supervision di DBN un crisis bancario financiero a tuma lugar na Hulanda y cu na Antiyas bou di supervision di e mesun CBCS nan no a pasa den e crisis ei y tin un clima financiero hopi solido compara ku Hulanda.  

SEGURO NA ARUBA NA PELIGER?

Manera ta conoci, algun aña pasa gobierno a pasa un ley cu ta obliga tur compania pa cera un pensioen pa nan trahadonan. Nan por a haci esaki cerca sea Ennia of Guardian/Fatum. Awe mainta varios instancia a acerca NoticiaCla.com cu e pregunta cu si nan placa ta sigur of no y kico esaki ta nifica pa nan pensioen aki na Aruba. Y si Banco Central di Aruba ta na altura di esaki y con bin nan no a actua. A tuma contacto cu e instancianan concerni pero te na momento di e raportahe aki, ningun di e instancianan a raporta bek ainda.

REACCION DI DIRECTOR ENNIA

Financieel Dagblad ta laga sa si cu via un reaccion por escrito, e director di ENNIA a laga sa cu e storia aki ta absurdo, y cu den e 10 añanan cu Ansary a cumpra ENNIA, e balor di ENNIA a subi cu 700% y cu entradanan a subi 33 biaha y e reservanan a subi cu 80%.