Rasmijn: Lo yama Sevinger 'op het matje' pa asunto di tereno 'berde'

ORANJESTAD - Parlamento lo manda yama minister Benny Sevinger 'op het  matje', pa e responsabilisa su mes pa e caso(nan) di tereno un biaha mas, segun parlamentario Donny Rasmijn a confirma na NoticiaCla.com. Esaki a raiz di e ultimo veredicto den corte e siman aki cu gobierno a perde contra Aruba Birdlife Conservation. Ta trata e caso di tereno(nan) berde na altura di Bubali Plas cu a y lo ta wordo duna como erfpacht na cierto companianan. Rasmijn ta confirma e palabracion den parlamento pa cu proteccion di e terenonan aki y como tal kier tende di e minister kico ta pasando cu e cosnan aki ta sigui sosode. 

NO POR LAGA PARTI ECONOMICO TUMA OVER!

E parlamentario ta mustra cu enberdad nos pais conoce e ROP (Ruimtelijke Ontwikkelings Plan), cu ta existi di 2009 y cu tin un validez pa 10 aña. Riba dje e ta e confirma cu e tereno en cuestion ta un tereno 'berde' y te ainda e ROP ta valido. " Y bo ta haya bo cu cosnan asina'ki ta pasa cu ta tiki fastioso. Nos mester por evita cosnan asina" Rasmijn a bisa. Mes momento e ta confirma cu algun aña pasa e mes a entrega un mocion pa cuminsa proteha e areanan aki (16 area habita pa pahra) incluso Bubali Plas. "Nos tabata kier e regla via un landsbesluit. Te ainda gobierno ta bezig cu ne y ta progresando. Ayera mes mi a bay find out" Rasmijn a sigui bisa. E realidad segun Rasmijn, ta cu e proteccion aki di nos medio ambiente mester cuminsa drenta na vigor. "Hopi biaha nos ta laga e parti economico tin e prioridad. Pero si nos no proteha nos medio ambiente, nos ta keda mes leu. Si mayan nos laga economia take over tur cos di nos pais, bo no tin un atraccion pa bin aki tampoco" Rasmijn a sigui bisa. 

ACTUACION CORECTO DI HUEZ

E ta mustra cu di un banda huesnan ta 'echt' mantene e regla di ROP, y ta kere cu e ta un 'eyeopener' cu nos mester ta hopi mas conciente pa nos medio ambiente pa loke ta afgifte di tereno. "Mi ta kere cu esaki ta un trabou cu hues a haci imparcialmente y ta duna e ROP e beneficio di duda. 

A mustra cu tabatin reunion cu e minister concerni den pasado, y lo bay tin reunion cu ne atrobe pa atende riba e punto aki pa un biaha mas e maneho cu e ta bay sigui hiba, ta den liña cu e ROP y den liña di pensamento cu parlamento tin. "Precies con esaki ta tumando lugar y por a tuma lugar, nos tin cu haya di e minister y make sure pa e no pasa mas den futuro. Seguramente nos ta bay papia cu ne pa haya esaki". E parlamentario kier evita cu 'nos' ta sigui perde caso pa e forma con e minister ta atendiendo cu e asunto di tereno.