Pidi asilo politico no ta facil pasobra 'Aruba no tin experiencia riba e tema'

ORANJESTAD - "Aruba no tin experiencia riba e tema di asilo politico ". Asina e persona cu lo por bira e prome den historia di Aruba pa haya asilo na Aruba, a comenta na NoticiaCla.com den un entrevista exclusivo. Cu e condicion cu no ta divulga su nomber ni su lugar di origen, y cu pa e storia aki lo haya e nomber ficticio di 'Pedro', el a bay di acuerdo pa conta su odisea for di momento cu el a pone pia riba Aruba. Hunto cu su yiu, nan ta en espera di tramitenan pa wak si por honra nan peticion di asilo politico. Mientrastanto, nan tin refugio na Cruz Cora cu a bira nan cas 'temporal'. Su storia ta un ehempel di e realidad na Aruba, cu hopi no por of kier wak, pero cu lo por bira e situacion aki un par di tempo. 

SU YEGADA NA ARUBA

Manera previamente indica, 'Pedro' y su yui a yega Aruba algun luna pasa cu boto na Barcadera y mesora a informa imigracion cu e ta pidi asilo politico debi na persecusion di su pais. "Mesora nan a bisa mi cu Aruba no ta duna asilo politico". Esey ta wordo bisa na cualkier persona cu drenta Aruba, mientras cu segun e tratado internacional di refugiado, Aruba no por nenga un persona sin mas si e haci e peticion pa asilo politico. Esaki pasobra desde 1986 Aruba tambe ta forma parti di e tratado internacional di refugiado, ora cu el a haya su status aparte. Mester acept'e temporalmente mientras ta investiga su situacion y su storia. Pedro ta wordo considera como un refugiado, y como tal ta cay bou di e tratado aki tambe. Un refugiado pa definicion, ta un persona cu ta incapas of no kier bolbe su pais di origen, debi na un miedo 'bon funda' di ta wordo persigui pa un motibo. Sea pa motibo di rasa, religion, nacionalidad, miembro di un grupo particular social  of opinion politico. Minister di husticia Arthur Dowers recientemente sinembargo a mustra durante un conferencia di prensa, cu personanan cu bin Aruba y pidi asilo politico, lo wordo manda bek nan pais 'debi cu nan a yega nos isla di un forma ilegal'. Ademas solamente si ta pa motibo di persecucion contra bida of morto, por evalua esaki. Den e caso di e persona aki, Pedro, ta trata di persecusion politico y cu e ta teme pa su bida. Imigracion a tuma contacto cu Cruz Cora di Aruba mesora pa nan sigui atende cu e persona aki. Esey tabata algun luna pasa. Awe, ainda Pedro ta 'hospeda' na e shelter sin sa kico lo pasa cu ne y su yiu. Cruz Cora tin facilidad pa 20 cama den nan shelter na Dakota, pero pa un periodo temporal. No pa un periodo largo. Sinembargo, 'Pedro' tin Cruz Cora como su adres pa awor. Pedro mientrastanto tabatin su prome cita cu DIMAS, cu a dun'e un permiso di estadia, cu ta un derecho pa permanece riba e isla si, pero no cu e por traha ni inscribi su mes na Censo. Loke ta interesante ta cu riba e papel di gobierno cu el a haya di permiso, ta poni cu e mester raporta 'un biaha pa siman na e oficina di Guarda Nos Costa na Tarabana Z/N tur diasabra, y si e no haci esaki e por perde e permiso cu tur consecuencia cu por tin, manera deportacion. E problema aki ta sinembargo cu e oficina ey, ta cera riba tur diasabra. 

E JERUSALEM NOBO

Prome cu Pedro a tuma e desicion di subi lama den un boto y biaha pa Aruba, un amigo sacerdote a bis'e cu e tin cu bay, cruza lama y ora cu e yega su destinacion nobo, consider'a e destinacion ey, esta Aruba, como 'E Jerusalem nobo'. "Mi a gusta esey. Awor mi ta considera Aruba pues como e Jerusalem nobo". E comparacion pa Pedro por ta apropia. Jerusalem ta considera como un di e ciudadnan mas bieu di mundo, y den pasado, hende tabata yama Jerusalem 'Urusalima', esta ' Ciudad di paz' 2400 AC.  Y Pedro ta sinti esey na Aruba. "Aki mi ta sinti cu mi tin paz atrobe". 

PAKICO ARUBA?

E motibo cu a scohe pa Aruba, ta pasobra e tabata e prome opcion y mas cerca di unda cu el a bin. Ademas conociendo Aruba como un isla cu ta cay bou di Reino Hulandes, a kere cu e lo tabatin e mesun derecho cu Hulanda tin y ta trata riba e tema di e.o. derecho humano y asilo politico. "Pero lamentablemente no ta asina. E leynan aki ta hopi diferente (cu Hulanda). Aruba no tin experiencia (riba e tema aki). De hecho mi a wordo bisa cu si mi logra haya asilo, mi lo ta e prome caso na Aruba".

BIDA NA ARUBA

Pedro ta mas preocupa pa su yiu cu e ta p'e mes. Esaki pasobra su yiu no por bay scol, y ta carece di educacion awor. E mes, un persona educa cu un grado di ley na su pais, ta mantene su mes ocupa yudando na Cruz Cora. "Hopi nos no por haci. Nos ta sali, aki aya pero no mucho leu. Misa nos ta frecuenta, y cierto lugarnan. Mas no" Pedro ta sigui bisa. Como cu e permiso cu e tin no ta permiti'e pa registra na censo, e no por tin aceso na AZV y ta pone cu si cualkier cos pasa e of su yiu, medicamente nan lo ta pega. Esey ta tambe un di su preocupacionnan mas grandi cu e tin aworaki, esta e falta di tin acceso na docter. Asina mes, e trankilidad cu e tin na Aruba ta lag'e sinti cu e desicion cu el a tuma di bandona su pais, ta uno corecto. E no tin un idea cuanto tempo mas e por sigui asina, pero ta spera cu pronto e por haya sa algo di su situacion.