Situacion economico na Venezuela no ta hustifica asilo politico pa Aruba

ORANJESTAD - Ilegalnan cu yega Aruba p.e. di Venezuela, no por djies yega pidi asilo politico. "E no ta asina facil cu tur hende por djies yega pidi asilo politico" minister di husticia Arthur Dowers a sigura NoticiaCla.com dialuna. E motibo cu lo por nenga e asilo pasobra na e momento aki na Venezuela no tin un situacion cu ta hustifica esaki. "Si bo tene cuenta cu e situacion economico na pais bisiña ta malo, enberdad ta malo esey no ta hustifica si cu bo por pidi asilo politico" Dowers a splica. Mirando cu por spera un situacion for di Venezuela unda cu hendenan por cuminsa yega Aruba den forma di refugio, a surgi e pregunta. 

ASILO POLITICO

Ora cu pidi asilo politico, tin henter un proceso y rasonnan bou di cua un hende por haya un asilo politico. Esey sinembargo ta cay bou di minister di permiso Benny Sevinger. E proceso aworaki ta cu ora cu un persona yega Aruba di forma clandestino, bo ta wordo tuma den detencion (vreemdelingen detentie) y despues bo ta wordo manda bek bo pais, pasobra e condicionnan ne pais bisiña ta responsabel pa bo manda e hendenan bek. "Mi no ta kere na e momento aki cu hendenan por djies yega clandestino y pidi asilo politico", e mandatario a bisa.