Sugerencia di AHATA pa uni cartera turismo y economia ta simpatico

ORANJESTAD - E idea pa uni e carternan di ministerio di turismo y economia ta uno simpatico. Asina e mandatario di turismo Otmar Oduber a bisa NoticiaCla.com como reaccion riba e sugerencia haci siman pasa pa AHATA. Den nan carta pa gobierno cu recomendacion, a plantea e posibilidad ey. "E idea ta simpatico. Riba su mes nos tin cu pensa den futuro enberdad mirando e influencia cu turismo tin cu economia" Oduber a bisa. E ta recorda cu den pasado a separa e dos carteranan for di otro mirando cu turismo tabata un cartera hopi pisa riba su mes. 

RELEVANCIA DI E PETICION DI AHATA

Pa loke ta e relevancia di e ley aki di all inclusive cu ta na discusion aworaki, Oduber a mustra cu tin un protocol pa dos aña caba entre departamento di asuntonan economico y turismo, unda cu vestigingsvergunning ta haya un advies di ministerio di turismo prome cu esaki wordo otorga. E meta cu AHATA kier logra di un coherencia, t'ey caba pues pa esey no mester uni e carteranan. A splica tambe den e contesta pa AHATA, cu si haci e cambio di cartera mes, esaki lo encapara solamente permisonan nobo. Den e caso di e ley di all inclusive, esaki no ta conta sinembargo pa vestigingsvergunning nobo sino tambe esnan cu tin un permiso caba.